Hatutan.com, (23 Agostu 2023), Díli—Movimentu Estudante Tane Oe-cusse (METO) la konkorda ho desizaun Prezidente Autoridade Rejiaun Administrativa Espesiál Oecusse Ambeno (RAEOA), Arsénio Paixão Bano ne’ebé “fa’an” uma Estadu iha área Fulolo, aldeia Sanane, Suku Costa, Sub Rejiaun Pante Macasar, bá Mari Bim Amude Alkatiri, no husu intervensaun Comissão  Anti Corrupção (CAC) ho IX Governu Konstitusionál atu halo investigasaun.

Movimentu Estudante Tane Oe-cusse (METO) hala’o konferénsia imprensa kontra desizaun Prezidente Autoridade Rejiaun Administrativa Espesiál Oecusse Ambeno (RAEOA), Arsénio Paixão Bano ne’ebé “fa’an” uma Estadu iha área Fulolo, aldeia Sanane, Suku Costa, Sub Rejiaun Pante Macasar, bá Mari Bim Amude Alkatiri. Konferénsia ne’e hala’o iha Jardin 5 de Maiu Colmera, Kuarta (23/08/23). Foto: Elio dos Santos da Costa.

Portavós METO, Abílio da Cruz Quefi liu hosi konferénsia imprensa diskorda atu Arsénio Bano “fa’an” uma Estadu ne’e tanba eis Prezidente Autoridade, Mari Alkatiri rasik mak antes ne’e ukun iha RAEOA hada’u tiha komunidade nia rai iha área ne’e ho razaun atu halo dezenvolvimentu ikus mai hatama hikas ninia interese hodi hola fali uma Estadu ne’e sai fali ninia propriedade, enkuantu tusan indemizasaun  ne’ebé nia husik hela bá komunidade afetadu sira seidauk selu to’o ohin loron.

Lee Mós: Ministru Justisa Konsidera Arsénio Bano “Fa’an” Uma Estadu Fulolo Ne’e illegál

METO lori estudante Oecusse oan tomak no komunidade RAEOA nia lian, hato’o bá públiku liuliu ba IX Governu Konstituisionál atu toma atensaun hodi foti medida imediata bá desizaun Arsénio Bano nian, ne’ebé uza nia kompeténsia hodi fa’an tiha rezidensia Estadu ne’e.

“Hanesan estudante ne’ebé pertense mós bá Oecusse, lamenta teb-tebes ho aktu Arsénio Bano nian ne’ebé uza ninia autoridade hodi fa’an rai no rezidensia Estadu iha Fulolo bá pessoál Mari Bin Amude Alkatiri. Husu CAC ho Governu atu halo investigasaun lalais no tenke interven duni hodi trava tanba Rai no uma Estadu tenke pertense ba Estadu, la’ós sai fali propriedade privada,” Abílio da Cruz Quefi hateten iha jardin 5 de Maiu Colmera, Kuarta (23/08/23).

Estabelesimentu RAEOA no ZEESM-TL iha tinan 2015, bazeia bá Lei númeru 03/2014 de 18 de Juñu, hetan aprovasaun hosi Parlamentu Nasionál (PN), atu implementa programa pilotu sira iha Oecusse, Mari Alkatiri haree katak Fulolo hanesan rai estratejiku ba Estadu hodi etabelese obra ruma nune’e bele korresponde bá interese públiku tuir nesesidade ne’ebé Estadu presiza.

Tanba ne’e maka komunidade afetadu sira oferese rai ne’e ba dezenvolvimentu rai Oecusse, maibé ikus mai seidauk selu indemizasaun, no Arsénio Bano tenke fa’an fila-fali ba ema pessoál, ida-ne’e METO konsidera hanesan traisaun bá povu atoni.

“Hanesan estudante Oecusse oan konsidera Eis-Prezidente Autoridade RAEOA halo ho intensaun atu benefisia nia an la’ós ba interese públiku, tanba nia rasik mak kria, ikus nia rasik mak sosa hodi privatiza tiha rai no uma Estadu ba nia an,” nia hateten.

Tanba ne’e, METO husu ba parte Notariadu RAEOA atu mantein emite kontratu definitivu hanesan eskritura publiku dokumentu auténtiku.

Husu Parlamentu Nasionál atu halo inkéritu no Komisaun C atu halo fiskalizasaun ba Prezidente Autoridade RAEOA.

Husu ba CAC atu halo investigasaun imediata ba patrimóniu Estadu ne’ebé mak fa’an ba pessoál ida.

Husu ba IX Governu Konstituisionál atu toma atensaun hodi halo intervensaun lalais bá Prezidente Autoridade nia desizaun hodi fa’an rai no rezidensia Estadu ne’e.

Lee Mós: Arsénio Bano “Fa’an” Uma Estadu iha Fulolo bá Alkatiri

Jornalista Estajiáriu: Lazaro Pereira Quefi