Hatutan.com, (22 Agostu 2023), Díli—Ministru Justisa (MJ), Amândio de Sá Benevides konsidera uma Estadu iha área Fulolo, aldeia Sanane, Suku Costa, Sub-Rejiaun Pante Makasar ne’ebé Prezidente Autoridade Rejiaun Administrativa Espesiál Oecusse Ambeno (RAEOA), Arsénio Paixão Bano “fa’an” bá eis Prezidente Autoridade, Mari Bim Amude Alkatiri, ne’e illegál.

Ministru Justisa (MJ), Amândio de Sá Benevides.

“Fa’an bá ema pessoál ne’e illegál no hetan ona rejeisaun hosi parte Diresaun Jerál no Rejistu Notariadu Oe-cusse. Ita haree katak laiha nesesidade atu fa’an. Ita tenke fa’an bá ema ne’ebé laiha rai. Ita nia Constituição República Democrática de Timor-Leste, artigu 54 hateten katak, ema hotu-hotu presiza iha fatin ida, quer dizer bá ema sira ne’ebé fatin seidauk iha,” Ministru Justisa hateten iha Parlamentu Nasionál (PN), Tersa (22/08/23).

Lee Mós: “Fa’an” Rezidénsia Fulolo, Notariadu RAEAO Konsidera La Prienxe Rekezitu

Ministru Justisa, Amândio de Sá Benevides hateten, Governu sentrál liu hosi Diresaun Jerál Rejistu Notariadu ne’ebé mak tama konta ba uma notáriu hotu-hotu, sira nia servisu ida maka halo negósiu jurídiku liu-liu ba ema sira ne’ebé hakarak halo kontratu kompra e venda (Sosa no fa’an) no kona-bá rezidénsia Fulolo notariadu RAEOA rejeita atu halo aktu compra e venda, tanba konsidera laiha nesesidade atu fa’an uma Estadu ba pessoál ida.

Ba ema ida ne’ebé halo aktu compra e venda halo ona rekursu mai iha Diresaun Jerál Rejistu Notariadu ne’ebé mós rejeita ona katak labele halo tanba laiha kabementu legál atu halo aktu ida-ne’e, por enquanto sasan Estadu nian ne’e Estadu nian duni.

“Governu sei repoen ka foti fila rezidénsia Fulolo ne’ebé Prezidente RAEOA fa’an. Labele fa’an no klaru katak Governu sei foti fila-fali. Labele halo fali buat ida ne’ebé viola fali lei. Se Lei la fó dalan atu halo, labele halo,” nia hateten.

Ministru mós subliña katak, sei iha aktu administrativa, Ministériu Justisa liu hosi Diresaun Jerál Rejistu Notariadu indefere ona pedidu hosi ema ne’ebé mak fa’an rezidénsia Fulolo,.

Nia hatutan, bainhira sira hakarak bele halo rekursu kontensiozu Estadu hasoru desizaun Administrativa pois haruka ba Tribunál mak bele haree atu ba fó resposta. Maibé bainhira parte ne’ebé mak hetan indeferimentu bá nia rekerimentu ne’e, la halo rekursu kontensiozu ka halo pugnasaun ruma ba Tribunál, rai no rezidénsia Fulolo ne’e nafatin hela hanesan rai Estadu nian.

“Aktu ida halo hodi fa’an rezidénsia Estadu Fulolo ba ema pessoál ne’e aktu illegál,” Ministru ne’e subliña.

Lee Mós: Arsénio Bano “Fa’an” Uma Estadu iha Fulolo bá Alkatiri

Jornalista: Vito Salvadór