Hatutan.com, (13 Setembru 2023), Díli- Governu liuhosi Ministériu Justisa garante katak kaderneta passaporte ne’ebé daudaun ne’e prodús hela iha Finlándia nia kualidade di’ak liu  no iha  intermu seguransa as liu kompara ho passaporte sira antes ne’e.  

Lee Mós : Kaderneta Pasaporte 1.000 Sei To’o Uluk TL iha Setembru Nia Rohan

Passaporte komún RDTL. Foto/Dok.Hatutan.com

Ministru Justisa Amândio de Sá Benevides afirma, nasaun barak iha ASEAN ne’ebé Timor-Leste nia passaporte di’ak liu. Timor-Leste nia passaporte di’ak liu mós nasaun viziñu Indonézia nian, tanba ne’e kaderneta passaporte pilotu ne’ebé sei mai iha fim de fulan-Setembru hamutuk 1000 nafatin tau prioridade bá kualidade no seguransa.

“Kaderneta passaporte Timor-Leste nian oras ne’e dadaun halo hela produsaun no sei too iha fim de fulan-Setembru ne’e, nia kualidade di’ak liu ida antes ne’e. Ida uluk ne’e primeira jerasaun, ida agora ne’e segundu jerasaun, nia kualidade di’ak liu no seguransa as liu. Ita nia passaporte nia kualidade di’ak liu iha mundu no hanesan ho Singapura nian,” Ministru Justisa Amândio de Sá Benevides, hateten hodi responde Hatutan.com iha auditória Ministériu Finansas, Aitarak Laran, Tersa (12/09/2023).

Ministru Justisa iha IX Governu ne’e hatutan prosesu produsaun bá kaderneta passaporte lao hela, laiha konflitu de interesse ruma entre empreza Visi Mitra no mós empreza produtór Thales iha Finlándia.

“Laiha konflitu interesse, Ministériu Justisa jere hela situasaun hotu-hotu, hein deit katak iha fim de fulan-Setembru kaderneta passaporte  to’o mai Timor-Leste,”  Ministru Amândio de Sá Benevides afirma.

Sita hosi https://visaindex.com/ kona-ba “Guide Passport Ranking Index” hatuur Timor-Leste nia kualidade passaporte iha rangking bá da-58.  Passaporte Timor-Leste iha inzensaun vistu iha bá nasaun 134.

Haktuir mós hosi Passport Index katak daudaun ne’e Uniaun Emiradu Árabe (UEA) mak sai hanesan nasaun primeiru klarifikasaun iha mundu ne’ebé kualidade pasaporte di’ak liu ho nia mobilidade score 181.

Índise Kualidade Passaporte Timo-Leste nian di’ak liu Nasaun lubun iha iha ASEAN. Foto/Repro

Ho de’it pasaporte UEA, sidadaun sira UEA nian  livre visa (visa-free) bá nasaun-116, inklui bá Dinamarka, Fransa, Finlandia, Alemaña, Grésia, Italia, Olanda, Árabe Saudita, Singapura, Suisa, Suésia ho Indonézia.

Iha tinan 2019 kualidade konsege monu to’o iha pozisaun númeru 13, maibé hosi 2020-2023, UEA hatuur hikas nia pozisaun sai primeiru lugar iha mundu.

Iha segundu pozisaun ho kualidade pasaporte di’ak liu mak Suésia. Total mobilidade score  purvolta  174.  Sidadaun Suésia bele asesu livre vistu bá nasaun 122 iha mundu, ezemplu Reinu Unidus, UEA, Suisa, Polandia, Qatar, Norwegia, Monaco, Indonézia, dan Islandia.

Mobility score Indonézia nian ho total 88, no  Timor-Leste rasik iha 101. Nune’e, Indonézia iha klasifikasaun 75, no Timor-Leste iha klasifikasaun 58.

Sidadaun Indonézia ho passaporta Indonézia bele hetan vistu livre bá nasaun  71 iha mundu no  Timor-Leste barak liu ho mobility score ho vistu  livre bá nasaun 94 iha mundu.

Jornalista: Vito Salvadór