Hatutan.com, (13 Setembru 2023), Díli- Prezidente Repúblika (PR), José Ramos-Horta, Kuarta (13/09/2023),  simu karta kredensiál husi Embaixadór hamutuk na’in-neen (6) ne’ebé sira-nia rezidente iha Jakarta-Indonézia.

Prezidente Republika, Jose Ramos-Horta. Foto/Elio dos Santos da Costa

Embaixadór na’in-neen ne’ebé entrega karta kredensial ne’e  mak hanesan, Ahmed Abdullah Alharmasi, embaixadór hosi Reinu Bahrain ne’ebé hela iha Jakarta, Abdullah Salem Obaid Salem AlDhaherri, embaixadór  Emiradu Árabe Unidu (EAU) hela iha Jakarta, Faisal Abdukkah H. Amodi, embaixadór  Arábia Saudita hela iha Jakarta, Oliver Zehnder, embaixadór  Konfederasaun Suísa hela iha Jakarta, Padanig Francis, embaixadór  Repúblika Irlanda hela iha Jakarta, ho Fabien Penone, Embaixadór  Repúblika Franseza ne’ebé hela iha Jakarta-Indonézia.

Ho kredensial husi Embaixadór naun-rezidente sira ne’e nu’edár Estabelesimentu no reforsa ligasaun amizade entre Repúblika Demokrátika Timor-Leste ho nasaun  seluk mak importante tanba Timor-Leste nu’udár nasaun soberania ne’ebé interdependente  globalmente no rejiaunalmente.

Vise-Ministra bá Asuntu ASEAN, Milena Rangel ne’ebé akompaña Prezidente Repúblika simu karta kredensiál sira-ne’e hateten embaixadór sira-ne’e mai aprezenta sira nia kredensial no mós hakarak atu servisu besik liután ho Timor-Leste atu reforsa  kooperasaun bilaterál  hamutuk ho ASEAN oinsá prosesu Timor-Leste nian bá ASEAN. 

Jornalista: Vito Salvadór