Hatutan.com, (15 Setembru 2023), Díli—Ministériu Públiku (MP) liuhosi Prokuradór António Tavares, alega suspeitu ho inisiál AMV bá prizaun preventiva tanba deskonfia nu’udár autór bá kazu lori traballadór timoroan sira iha Korea Sul, konsege fó no haruka osan liuhosi konta bankária ho valór $2.964.

Alegasaun ida-ne’e, liuhosi Prossesu primeiru interrogatóriu judisiál ne’ebé hala’o iha Tribunál Judisiál Primeira Instánsia Díli (TJPID), Sesta 15 Setembru 2023 tuku 14:00 otl.

Lee Mós: PNTL Deskobre Rede Tráfiku Umanu Ne’ebé Rekruta Timoroan Bá Servisu Iha Malázia

Durante primeiru interrogatóriu judisiál ne’e, Prokuradór António Tavares husu Tribunál atu aplika medida koasaun prizaun preventive tanba konsidera arguidu komete kazu krime Burla Agravadu.

Defensória Jerál Repúblika liuhosi Defensór Marçal Mascarenhas dehan, nia parte aseita ho alegasaun MP nian tanba kestaun seguransa bá suspeitu rasik. Bainhira liberta bele mosu fali buat seluk bá suspeitu.

“MP husu prizaun preventiva ami konkorda. Sai bá mak ema oho tiha nia halo nusá. Problema mak ne’e. Minimál tau prizaun preventive, ne’e signifika provizóriu tau lai iha ne’ebá atu investiga. Aban bainrua hotu lai depois julgamentu mak ita bele tetu,” Marçal Mascarenhas hateten, hafoin akompaña nia kliente iha Tribunál Díli, Sesta (15/09/2023).

Ho hahalok kríme hosi Arguidu AMV ne’e, traballadór Timoroan sira mak durante servisu iha nasaun Korea Súl, liu-liu hirak ne’ebé sai vítima, haruka duni osan mai suspeitu iha Timor-Leste no baibain nia bá foti osan sira ne’e iha Money Gram, Timor Plaza.

“Kazu ne’e lohi ema, hatudu sasán lulik no bainhira lakohi fó osan entaun nia atu publika. Ne’e mak ema haruka osan arbiru de’it bá nia no nia konfesa ida-ne’e. Nia hamutuk ho feto ida naran inisiál E, agora polisia buka hela,” Defensór ne’e informa.

Iha prosesu primeiru interrogatóriu ne’e, Arguidu mós konfesa momoos kona-bá ninia aktu sira katak, nia foti duni osan sira ne’e dala-tolu ona ne’ebé mak haruka hosi traballadór sira. Primeiru, nia foti $450, tuir fali $2.000 no ikus liu maka $514. Nune’e, valór totál osan ne’ebé simu ona, iha $$2.964.

“Ohin iha Tribunál, nia konfesa katak, foti osan dala-tolu ona, nia dehan, osan balun nia fó bá iha feto ida naran E. Maibé E ne’e ninia númeru telefóne fó hotu ona bá polisia,” nia hateten.

Hafoin rona parte hotu, Tribunál liuhosi Juiz Singular Afonso Carmona, a-dia desizaun bá Sábadu (16/09/203) tuku 10:00 otl.

Audiénsia primeiru interrogatóriu ne’e prezide hosi Juiz Singular Afonso Carmona, Ministériu Públiku (MP) reprezenta hosi Prokuradór António Taváres no Arguidu hetan asisténsia legál hosi Defensór Marçal Mascarenhas.

Fó hanoin fali katak, iha Kuarta (13/09/2023) tuku 15:00 otl, Polisia Nasionál Timor-Leste (PNTL) liuhosi Departamentu Investigasaun Kriminál (DIK) kaptura suspeitu AMV ho Flagrante delito, tanba nia involve iha kazu tolu, mak hanesan, Burla Agravadu, Furtu Agravadu, ho ida tán bolu Grooming ka Cyber Crime.

Xefe DIK Superintendente Polísia João dos Reis Belo esplika, razaun polísia halo kapturasaun bá suspeitu ne’e tanba halo kríme ho modus operande, servisu hamutuk ho sidadaun Indonézia feto ida ho identidade inisial S, hela iha estranjeiru.

Iha kazu ida-ne’e, suspeitu AMV ho S, futu-lia, katak, sidadaun feto ne’e mak halo relasaun domin ho traballadór Timoroan sira iha rai Korea Súl liuhosi de’it média sosiál facebook, wats apps.

“Depois fínje naroman tiha, tama WA halo video hatudu sasan lulik depois sidadaun estranjeiru feto ne’e manda fali video ho foto sira ne’e bá suspeitu AMV. Alende ne’e halo ameasa atu publika, karik sira la fó osan,” João dos Reis Belo informa.

Jornalista: Rogério Pereira Cárceres