Hatutan.com, (19 Setembru 2023), Díli— Konsellu Ministru (KM) aprova ona projetu Dekretu-Lei ne’ebé aprezenta hosi Ministru Administrasaun Estatál (MAE), Tomas do Rosario Cabral kona-bá alterasaun datoluk ba Dekretu-Lei nu. 6/2014, loron 26 fulan-fevereiru, kona-bá rekursu materiais no insentivu finanseiru lideransa komunitária nian sira, no kria servisu administrasaun Suku nian.

Ministru Administrasaun Estatál (MAE), Tomas do Rosario Cabral. Foto: MAE.

Aprovasaun ne’e ne’e realiza iha Konsellu Ministru ne’ebé hala’o iha Palasiu Governu, iha Tersa (19/09).

Lee Mós: Ataúru Goza Tratamentu Administrativu no Ekonómiku Espesiál

Ho intervensaun normativa ida-ne’e, halo kriasaun Servisu Administrasaun Suku, hanesan servisu administrativu apoiu ba Xefe Suku, no haforsa valór subvensaun públika ne’ebé fó hosi Estadu ba Xefe Suku sira ba finansiamentu despeza sira ne’ebé relasiona ho pagamentu remunerasaun rekursu umanu sira ne’ebé presta atividade iha servisu administrasaun Suku nian ne’ebé kria agora.

Diploma ne’e halo mós armonizasaun ba ninia redasaun ho Dekretu-Lei nu. 49/2023 no permite pagamentu ajuda kustu ba lider komunitáriu sira, bainhira hirak-ne’e mobiliza ona hosi administrasaun sentrál Estadu, direta ka indireta nian, hodi partisipa iha atividade ne’ebé organiza no hala’o ona hosi órgaun no servisu sira-ne’e.

Servisu Administrasaun Suku kompostu husi Sekretáriu Administrasaun Suku, Ofisiál Administrasaun Suku, Ofisiál Finansas Suku no Ofisiál Asuntu Sosiál Suku.

“Sekretáriu Administrasaun Suku responsavel ba diresaun no supervizaun ba atividade sira ne’ebé hala’o husi ofisiál administrasaun, finansas no asuntu sosiál sira, hodi garante katak sira halo tuir instrusaun no orientasaun sira Xefe Suku nian no hetan remunerasaun mensál dolar amerikanu hamutuk 170,” Hatutan.com sita komunikadu.

Ofisiál Administrasaun Suku responsavel ba prestasaun apoiu Xefe Suku kona-ba administrasaun no espediente jerál, tuir orientasaun Sekretáriu Administrasaun Suku no hetan remunerasaun mensál dolar amerikanu hamutuk 150.

Ofisiál Finansas Suku responsavel ba prestasaun apoiu ba Xefe Suku kona-ba jestaun finansas Suku nian, tuir orientasaun Sekretáriu Administrasaun Suku no hetan remunerasaun mensál dolar amerikanu hamutuk 150.

Ofisiál Asuntu Sosiál Suku responsavel ba prestasaun apoiu ba Xefe Suku kona-ba asuntu sosiál Suku nian, tuir orientasaun Sekretáriu Administrasaun Suku no hetan remunerasaun mensál dolar amerikanu hamutuk 150.

Alende ne’e, Konsellu Ministru mós delibera ona hodi autoriza negosiasaun no asinatura memorandum entendimentu ida entre Provínsia Hunan, Repúblika Populár Xina no Administrasaun Munisipál Manatutu nian ne’ebé sei reprezenta hosi Ministru Administrasaun Estatál, Repúblika Demokrátika Timor-Leste, ho objetivu atu estabelese relasoins kooperasaun ba promosaun desentralizasaun administrativa no dezenvolvimentu lokál iha munisípiu Manatutu iha Timor-Leste.

Konsellu Ministrus fó mós podér tomak ba Ministru Administrasaun Estatál hodi asina memorandum entendimentu ne’e.

Jornalista: Rogério Pereira Cárceres