Hatutan.com, (26 Setembru 2023), Díli-Komisaun Anti Korrupsaun (CAC, sigla portugés) hala’o tiha ona prosesu investigasaun kriminál bá ró  ne’ebé Ministériu Edukasaun, Juventude no Desportu (MEJD) sosa bá estudante sira iha Eskola Téknika Vokasionál (ESTV) Peska Atauro. Iha prosesu ida-ne’e, CAC konklui ona nia investigasaun no nia rezultadu hotu submete ona bá Ministériu Públiku (MP) iha kedan  loron 08 fulan-Outubru 2021.

Lee Mós : MEJD Sosa Ró Folin $142,000 bá ESTV Peska Atauro La Utíl To’o Ferrujen

Ró ne’ebé MEJD sosa bá ESTV Peska Atauro iha 2016, maibé aat tiha iha 2017 too agora. Foto/Elio dos Santos da Costa

Ró  ne’ebé Ministériu Edukasaun, Juventude no Desportu (MEJD)  sosa utiliza Orsamentu Jerál Estadu (OJE) purvolta $142,000 ho objetivu atu tulun no fasilita estudante ESTV Peska  hodi hala’o prátika peska nian bá-mai Atauro, Díli, Oé-Cusse, nune’e mós bá munisípiu sira seluk.

“Relasiona ho Ró bá ESTV  Peska Atauro, sé ha’u la sala, ha’u la lembra ezatu, mais depois bele konfirma fila-fali ninia dadus. Ró ne’e, uluk iha tiha kazu, entaun CAC hala’o tiha ona investigasaun no termina tiha ona nia investigasaun. Relatóriu, ami remese tiha ona bá iha Ministériu Públiku iha tinan 2021 ka 2022, sé ha’u la sala,” Diretór Investigasaun CAC, José Verdial hodi responde Hatutan.com iha nia servisu fatin iha edifísiu CAC, Farol, Díli, Tersa (26/09/2023).

José Verdial informa, prosesu investigasaun kriminál ne’ebé CAC halo iha tempu ne’ebá nia konkluzaun maka, CAC konstitui arguidu na’in-rua (2), no rona ona mós sasin lubuk ida.  Arguidu sira-ne’e,MEJD ema, tanba MEJD mak sai na’in bá iha projetu no responsabiliza bá prosesu tomak sosa ró refere.

“Agora, ha’u labele hatete detalle liu bá ita-boot sira, ema na’in-rua ne’e sé-sé, tanba iha hela prosesu investigasaun, ami mós seidauk hatene nia prosesu ne’e, to’o tiha ona iha Tribunál ka seidauk, maibé, ami nia servisu maka ami konklui ona investigasaun no ami haruka ona relatóriu bá iha Ministériu Públiku,” José Verdial hateten.

Diretór Investigasaun CAC, José Verdiál.

La’ós ne’e de’it, CAC bolu ona mós na’in bá kompañia ne’ebé sosa ró ne’e, tanba bainhira liga ona ho investigasaun, ema sira hotu ne’ebé mak nakait ho prosesu ida ne’e, CAC halo hotu kedas investigasaun, no iha ninia konkluzaun finál.

“Ró ne’e tama tiha ona iha prosesu investigasaun kriminál, no CAC termina tiha ona. Prosesu bá ró ne’e, iha tiha ona Ministériu Públiku no nia kontinuasaun ne’e, kompeténsia Ministériu Públiku nian,” nia esplika.

Lee Mós: Komisaun E ho G Sei Fiskaliza Ró ESTV Peska Atauro Ne’ebé Aat iha Tasi-Laran

Jornalista: Rogério Pereira Cárceres