Hatutan.com, (03 Outubru 2023), Díli– Primeiru-Ministru (PM), Xanana Gusmão simu ona karta protestu hosi internal Polísia Sientífika Investigasaun Kriminál (PCIC, sigla portugés) ne’ebé nia konteúdu husu PM Xanana tau matan no halo reestruturasaun total bá PCIC.

Lee Mós: Deskonfia, Superiór Sira iha PCIC Komete Irregularidade no Abuzu Podér

Logotipu PCIC

Hafoin simu tiha karta ne’e iha loron-rua liubá, Primeiru-Ministru (PM), Xanana Gusmão hatún kedas despaxu bá Koordenadora Grupu Traballu bá Reforma Justisa, Lúcia Maria Brandão Freitas Lobato, atu bele haree karta ne’e ho nia konteúdu.   

“Ha’u hatene kona-bá karta ne’ebe hatama hosi parte balun iha internál PCIC, tanbá ha’u simu despaxu hosi Primieru-Ministru iha loron rua liubá, ha’u lahatene sé maka hakerek karta ne’e, maibé Primeiru-Ministru hatama bá ha’u ne’ebé iha karta ne’e haruka mós koñesimentu (Cc) hotu mai ha’u,”  Lúcia Lobato hateten bá Hatutan.com iha nia servisu fatin iha Palásiu Governu, Díli, Tersa (03/10/2023).

Lúcia Lobato, antigu Ministra Justisa ne’e konfirma katak,  karta ne’e nia lahatene sé mak hakerek tanba tau de’it dehan Investigadór sira PCIC ne’ebé  hakerek sasan barak iha karta laran kona-bá PCIC nia preokupasaun no situasaun.

“Grupu investigadór PCIC sira ne’e ezije bá Primeiru-Minsitru atu tau matan ba PCIC no atu troka ka muda estrutura sira hotu ne’ebé maka dadauk iha hela, no dala ida tan, iha karta ne’e ha’u lahatene sé maka hakerek ,maibé ne’e husi PCIC, o que serto ne’e la’ós husi Diretor Nasionál PCIC, tanba ha’u simu karta ne’e husi Primeiru-Minsitru, entau ha’u tenke haree saída maka sira hakerek iha laran,” Lúcia Lobato hateten.

Maske Lúcia Lobato lahatene se maka hakerek karta ne’e, tanba iha karta laran hakerek de’it grupu investigadór sira, maibé tanba Primeiru-Ministru haruka mai ona nia meza maka, nia tenke fó hanoin ruma bá Primeiru-Minsitru.

Lee Mós: Assanami Seidauk Lee Dokumentu Kona-bá Irregularidade no Abuzu Podér iha PCIC, PDHJ Seidauk Simu Keixa

“Ha’u husu ona atu hasoru Diretór Nasionál PCIC no xefe departamentu sira. Aban (Kuarta, 04 Outubru 2023), ami sei hasoru malu hodi hala’o enkontru iha tuku 10:00 Otl iha edifisiu PCIC no liu husi enkontru ne’e maka ha’u sei rona direitamente hosi Diretor Nasionál PCIC ho ninia Xefe Departamentu sira no ema ne’ebé maka servisu besik nia iha PCIC rasik, kona-bá buat hotu-hotu ne’ebe maka liga bá PCIC sira-nia servisu, difikuldade no bá oin presiza oinsá,” Lúcia Lobato hateten.

Koordenadora Grupu Traballu bá Reforma Justisa, Lúcia Maria Brandão Freitas Lobato. Foto/Gloria Maia

Nia garante katak bainhira hasoru malu tiha ho dirijente sira iha PCIC no hosi sorumutuk ne’e sei informa fila-fali bá Primeiru-Ministru Xanana Gusmão.  Maske nune’e, Lúcia Lobato hateten, ezijensia sira ne’e klaru katak tenke haree fila-fali bá lei PCIC nian ne’ebé dadauk vigora hela, oinsá maka atu troka sira, oinsá maka atu nomeia Diretor Nasionál PCIC, nomeia adjuntu, Xefe Departamentu sira, hirak ne’e estabelesidu ona iha lei ne’ebé hamosu PCIC ne’e rasik.

“Se lei sira ne’e seidauk muda ita tenke aplika afatin regra sira ne’ebé hamosu PCIC ne’e rasik, se sira PCIC hakarak halo reestrutura bá membru PCIC hotu ne’ebé dadauk servisu hodi hamosu diresaun foun iha PCIC maka tenke haree lei ne’e rasik,” nia subliña.

Ho kestaun hirak kona-ba reforma ne’e maka, Governu liu liu husi UNDP, dadauk ne’e halo ona kontratu ho perítu na’in-lima iha fulan ikus Febreiru ka inisiu fulan-Marsu 2024, foin hatene loloos saída maka Gabinete ida-ne’e atu propoin ba Primeiru-Ministériu kona-bá reforma setór Justisa, tanba  tenke halo analize situasionál ida atu haree didi’ak sistema justisa ne’e funsiona oinsa, depois maka foin bele propoin proposta konkreta bá Primeiru-Ministru atu reforma Setór Justisa ne’e.

“Iha tempu badak, peritus na’in lima ne’ebé rekruta husi UNDP atu mai tulun ita  halo diagnostika ida, halo analize situasionál ida bá setór tomak, husi analize ne’e maka sei hato’o relatóriu bá Governu,” Lúcia Lobato tenik.

Nia esplika  relatóriu ikus husi peritu na’in-lima ne’ebé maka Governu liu husi UNDP atu lori mai Timor-Leste hodi tulun halo analize situasionál ba setór Justisa, inklui mós PCIC nian, karik iha relatóriu ne’e ko’alia hotu kona-bá PCIC ne’ebé maka Governu tenke tau atensaun, entaun tenke halo tuir ida-ne’e.

Lee Mós: Ministru Justisa Promete Sei Ko’alia Kona-bá Irregularidade no Abuzu Podér iha PCIC

Jornalista: Gloria Maia