Hatutan.com, (03 Outubru 2023), Díli—Prezidente Uniaun Emiradu Árabe (UEA), Mohammed Bin Zayed Al Nahyan konvida Primeiru-Ministru (PM) Kay Rala Xanana Gusmão atu partisipa iha Conference Of the Parties (COP 28) ne’ebé sei ko’alia kona-bá assuntu mudansa klimátika iha mundu.

Prezidente Uniaun Emiradu Árabe (UEA), Mohammed Bin Zayed Al Nahyan hasoru malu ho Primeiru-Ministru (PM), Kay Rala Xanana Gusmão atu konvida hodi partisipa iha Conference Of the Parties (COP 28) iha Palásiu Governu, Tersa (03/10). Foto: Elios dos Santos da Costa.

United Nations Climate Change Conference (UNFCCC) ne’ebé hanaran COP28 sai nu’udár konferénsia mundiál ba mudansa klimátika ne’ebé hala’o kada tinan atu bele halibur péritu sira no ukun-na’in hotu-hotu iha mundu hodi konsolida idea sira ba mudansa klimátika.

Lee Mós: Ramos-Horta Simu Karta Kredensiál husi Embaixadór Nasaun-Neen ne’ebé Rezidente iha Jakarta

Iha tinan tolu nia laran, hahú hosi Simeira Rio no lansamentu Konvensaun Enkuadramentu Nasoins Unidas nian kona-bá Mudansa Klimátika (UNFCCC), Konferénsia parte sira-nian iha Konvensaun (COP) tinan-tinan konvoka ona nasaun membru sira atu determina ambisaun no responsabilidade, identifika no avalia medida klimátika sira.

Sesaun 21 hosi COP (COP21) lori ba akordu Paris, ne’ebé mobiliza asaun koletiva globál hodi limita aumentu temperatura globál ba 1.5C aas liu nivel pré-indústria iha 2100 no atua atu adapta ba efeitu sira ne’ebé iha ona hosi mudansa klimátika.

Konferénsia internasionál COP28 ne’ebé sei hala’o iha UEA ne’e hahú hosi loron 30 fulan-Novembru to’o 12 Dezembru tinan ne’e.

“Vizita ohin atu hato’o komprimentus hosi Prezidente Uniaun Emiradu Arabe no Vise-Prezidente UEA bá Kay Rala Xanana Gusmão ne’ebé assume kargu Primeiru-Ministru. Mai konvida mós Primeiru-Ministru atu partisipa iha konferénsia internasionál COP28 ne’ebé sei hala’o iha UEA,” Abdullah Salem Aidhaheri hateten hafoin hasoru Xanana Gusmão iha Palásiu Governu, Tersa (03/10).

Prezidente Uniaun Emiradu Árabe (UEA), Mohammed Bin Zayed Al Nahyan hasoru malu ho Primeiru-Ministru (PM), Kay Rala Xanana Gusmão atu konvida hodi partisipa iha Conference Of the Parties (COP 28) iha Palásiu Governu, Tersa (03/10). Foto: Elios dos Santos da Costa.

Resposta hosi Primeiru-Ministru, Kay Rala Xanana Gusmão kona-bá nia partisipasaun iha konferénsia internasionál COP28 ne’e seidauk iha serteza ho razaun Xefe Governu sei okupadu hela ho servisu sira nasaun ne’e nian, maibé hato’o obrigadu bá Estadu UEA ne’ebé fó ona konvite.

Iha sorumutu ho Primeiru-Ministru ne’e Embaixadór UEA ko’alia mós kona-bá vizita Xefe Estadu José Ramos-Horta nian ba UEA iha loron 13 fulan ne’e, hodi partisipa iha World Climate Action.

Iha vizita Xefe Estadu nian ba UEA ne’e hanesan hakat foun ida bá kooperasaun entre rai rua hodi diskute posibilidade kooperasaun nasaun rua ne’e nian iha futuru.

“Ita hein katak ho vizita Prezidente Repúblika Timor-Leste nian bele iha kooperasaun foun no buka-hatene área sira ne’ebé iha interese komún entre nasaun rua, iha seitór oioin no ami diskute ona kona-bá seguransa ai-han, agrikultura, edukasaun, infraestrutura mina-rai no gás,” nia informa.

Embaixadór UEA hein katak hafoin vizita hosi Prezidente Repúblika Ramos-Horta iha UEA,  hotu-hotu sei haree duni rezultadu pozitivu ida-ne’ebé bele ajuda no hametin relasaun di’ak liu tán.

Jornalista: Vito Salvadór