Hatutan.com, (04 Outubru 2023), Díli—IX Governu Konstitusionál liu hosi United Nations Development Programme (UNDP), sei halo rekrutamentu bá péritu na’in-lima atu halo análiza situasionál no diagnóstiku bá seitór justisa molok halo reforma bá área Justisa, tuir polítika no kompromissu bá prioridade Ministériu Justisa (MJ) nian durante loron 120.

Koordenadora Grupu Traballu bá Reforma Justisa, Lúcia Maria Brandão Freitas Lobato. Foto/Gloria Maia.

Koordenadora Grupu Traballu Reforma Justisa, Lúcia Lobato konvoka ona enkontru ho superiór sira iha Instituisaun Polísia Sientífiku Investigasaun Kriminál (PCIC, sigla Portugés) kompostu hosi Diretór Nasionál ho Xefe Departamentu sira, hodi ko’alía kona-bá servisu hamutuk ho péritu na’in lima ne’e liuliu haree kle’an kona-bá mekanizmu reforma justisa ne’e rasik.

Lee Mós: Xanana Nomeia Lúcia Lobato Lídera Grupu Traballu bá Reforma Seitór Justisa

“Grupu Trballu Reforma Justisa hala’o enkontru ho PCIC atu fahe informasaun ba malu hodi apoia oinsá reforma bá seitór Justisa ne’ebé mak importante tebes. Tanba ida-ne’e programa prioridade IX Governu nian. PCIC prontu servisu hamutuk ho péritus na’in-lima ne’ebé mak tempu badak Governu liu hosi UNDP sei rekruta atu mai halo análiza situasionál, diagnóstiku iha seitór justisa,” Lúcia Lobato hateten hafoin enkontru iha salaun PCIC Caicoli, Kuarta (04/10).

Lúcia Lobato mós hetan ona prontidaun hosi superior PCIC  nian ne’ebé sei apoia no fó informasaun bá péritus na’in-lima ne’ebé tempu badak sei to’o Timor-Leste hodi halo servisu no kuidadu ba vizaun jerál ida kona-bá seitór justisa ne’e rasik.

Koordenadora Grupu Traballu Reforma Justisa ne’e esplika katak, atu halo reforma ne’e tenke halo ho didi’ak no reforma ne’e rasik atu reforma sistema judisiál la’ós reforma atu sobu sistema ne’e.

“Tanba ne’e ita tenke hanoin pozitivu bá iha área PCIC nian. Entaun, bainhira péritu na’in lima ne’e to’o, sei aprezenta bá Governu liu husi Grupu Trballu Reforma Justisa,” nia hateten.

Bazeia bá tempu determinadu, péritu na’in-lima ne’e sei to’o Timor-Leste iha fulan Fevereiru 2024 atu Grupu Traballu bele hetan ona rezultadu análizé situasionál seitór justisa nian, nune’e Koordenadora Lúcia Lobato bele aprezenta bá Primeiru-Ministru Kay Rala Xanana Gusmão kona-bá proposta konkreta sira bá reforma Justisa inklui iha PCIC rasik.

Lúcia Lobato konsidera PCIC mós hanesan instituisaun ida iha seitór Justisa nia laran iha papél importante liuliu kona-bá investigasaun kriminál ka intervensaun bá kazu krime sira, nune’e iha biban enkontru  ne’e Grupu  Traballu ko’alia hotu assuntu ne’e.

“Papél PCIC sira nia funsaun imporante tebes. Klaru Governu tenke apoia. Dalaruma ita fó sala bá PCIC, maibé ita tenke tenta haree difikuldade saída mak PCIC enfrenta,” nia hateten.

Kona-bá oinsá maka atu halo alterasaun bá Lei PCIC nian, Lucía Lobato dehan tenke haree bá iha baze legál, no presiza hadi’a duni iha buat ruma, liu-liu estatutu PCIC nian, maibé ida ne’e kompeténsia Ministériu Justisa nian.

PCIC Entrega Planu Estratéjiku 2020-2023

Durante enkontru, Diretór Nasionál PCIC, Vicente Fernandes e Brito entrega planu estratéjiku PCIC nian hosi tinan 2020 to’o 2030 bá Koordenadóra Komisaun Reforma iha Seitór Justisa, Lúcia Lobato, fornese mós informasaun en-jerál, liuliu halo espésie diskusaun ida inklui Xefe Departamentu sira, kona-bá lala’ok PCIC nian dezde 2015 to’o 2023.

“PCIC rasik entrega planu estratéjiku 2020-2030, inklui situasaun reál, relatóriu hosi atividade 2015 to’o jullu 2023, ho re-estruturasaun,” Vicente Fernandes e Brito hateten.

Vicente Fernandes e Brito  esplika, re-estrutura ka reforma iha PCIC ne’e planu Governu nian, tanba ne’e mak ohin sira fornese informasaun hotu-hotu iha nível investigasaun kriminál, nível administrasaun, nune’e mós Interpol nian.

Kona-bá Interpol ninian ne’e oinsá mak atu instala baze de dadus Interpol nian iha Aeroportu Internasionál Nicolau Lobato, iha fronteira sira, atu tama mós iha faze ikus nian, iha mós Rejiaun Administrativa Espesiál Oecusse Ambeno (RAEOA) nomós iha Suai.

Hanesan Prokuradór, Vicente Fernandes e Brito konsidera prossesu dezenvolimentu ne’e sempre iha ninia dezafiu sira hanesan dezafiu esterna no interna instituisaun ninian, ne’ebé iha futuru tenke hadi’a duni nune’e halo melloramentu bá prestasaun servisu.

PCIC iha ninia kompeténsia bá kríme nian oinsá mak deteta, preve no investiga, ne’e kríme sira ne’ebé maka kompleksu, gráve, nomós ekonomia finanseira no ne’e buat ida la fásil. Ezíje sirkumstánsia barak, ezíje situasaun barak para alende investigasaun kriminál, PCIC mós tenke dezenvolve labotóriu forensika.

Jornalista: Rogério Pereira Cárceres/Gloria Maia