Hatutan.com, (04 Outubru 2023), Díli—Konsellu Ministru (KM) hala’o sorumutuk iha Palásiu Governu, Dili iha 04 Outubru, aprova ona projetu Rezolusaun Governu ne’ebé aprezenta hosi Ministru Prezidénsia Konsellu Ministru, Agio Pereira kona-bá Kódigu Konduta Membru Governu Konstitusionál IX nian, kompromisu autorregulatóriu ida ne’ebé orienta konduta Governante no membru sira hosi sira-nia Gabinete bainhira hala’o sira-nia funsaun.

Primeiru Ministru (PM), Kay Rala Xanana Gusmão asina termu posse perante Prezidente Repúblika no Prêmio Nobel da Paz José Ramos-Horta, iha loron serimónia fó knaar ba IX Governu Konstitusionál Repúblika Demokrátika Timor-Leste, Díli, loron-1, fulan-Jullu, tinan-2023. Foto/Elio dos Santos da Costa.

“Kódigu Konduta ne’e abranje prinsípiu esensiál sira, hanesan prosekusaun interese públiku, legalidade, transparénsia, imparsialidade no igualdade, integridade, onestidade, urbanidade no respeitu interinstitusionál,” Hatutan.com sita komunikadu.

Lee Mós: Koñese Membru IX Governu Konstitusionál Periúdu 2023-2028

Dokumentu ne’e ezije mós katak, membru sira Governu nian adota postura ida bá prevensaun no kombate korrupsaun no konflitus interese.

Alende ne’e, kria ona mós regra lubuk ida ne’ebé iha relasaun ho oferta no benefísius, no mós iha kombate ba asédiu seksuál no asédiu iha serbisu, hodi assegura integridade no responsabilidade iha funsaun públika.

Adosaun ba kódigu konduta ida-ne’e reforsa kompromisu Governu Konstitusionál IX nian ho transparénsia, étika no responsabilidade hosi ninia membru sira bainhira hala’o sira-nia funsaun, hodi promove konfiansa sidadaun nian ba instituisaun sira Estadu Direitu nian.

Jornalista: Vito Salvadór