Hatutan.com, (06 Outubru 2023), Díli- Kompañia  Aérea ho bandeira Timor-Leste, Aero Dili, Sesta loro-kraik (06/10/2023),  aprezenta aeromosa timoroan  na’in-10 bá Governu liuhosi Ministériu Transporte no Komunikasaun (MTK).

Lee Mós: Aero Dili-GMF Sepakati Kerjasama Heavy Maintenance

Iha biban ne’e na’in bá Empreza Aero Díli, Lourenço de Oliveira mós adianta informasaun katak iha tinan 2024 Aero Dili sei list ka aumenta tan aviaun rua (2) atu bele responde nesesidade aviasaun nian iha Timor-Leste.

Aero Dili aprezenta sira-nia aeromosa Timoroan bá Governu, Sesta (06/10/2023). Foto/Vito Salvadór

Lourenço de Oliveira hateten Aero Dili hateten dezde  inísiu to’o mai ohin loron operasaun aviaun Aero Dili nian enferenta dezafiu oioin, maibé kontinua hakat nafatin hodi hetan atendimentu lubuk ne’ebé sempre  akompaña hosi Autoridade Aviasaun Sivíl Timor-Leste (ACTL) no Aeroportu no Navegasaun Aérea Timor-Leste, Empreza Públika (ANATL,  E.P) atu bele prepara an, la’ós bá de’it negósiu, maibé rekursu umanu para bele la’o bá oin tuir timoroan nia espetativa.

Aero Dili prepara rekursu hahú ho aeromosa hamutuk na’in-10, maibé na’in-sia (9) de’it mak bele bá no ida iha de’it Timor-Leste no labele bá tamba problema ho pasaporte.

“Aeromosa sira ne’ebé Aero Dili iha, hahú tuir formasaun iha Díli, kontínua ba Jakarta no ikus liu iha Airbus nia fatin iha sidade Toulouse, Fransa,” Lourenço de Oliveira haktuir  iha nia diskursu serimónia agradesimentu ne’ebé hala’o iha salaun Ministériu Transporte no Telekomunikasaun no partisipa mós hosi Ministru Transporte no Komunikasaun, Miguel Manetelo ho kargu xefia sira iha instituisaun relevante.

Nia hatutan, tinan oin Aero Dili  list tan aviaun rua atu bele fasilita transporte Aero bá timoroan sira hodi bele semo bá iha nasaun sira ne’ebé Timor-Leste iha ona akordu ba.

“Aero Dili prepara hela kondisaun no rekursu hotu ne’ebé iha atu bele list tan segundu aviaun no Aero Dili iha previstu atu mai iha fulan-Maiu 2024, no terseiru aviaun sei too iha fulan-Agostu 2024,” Lourenço de Oliveira tenik.

Aero Dili prepara hela kondisaun para bele kobre ba nasaun sira ne’ebé Timor-Leste iha ona akordu Air Service Agrement (ASA), no hahú Dezembru tinan ne’e Aero Dili bele ona semo ba Singapura no hosi parte Austrália nian oras ne’e hamutuk hela ho Aero Dili atu halo levantamentu atu nune’e bainhira Austrália simu ona, maka bá oin Aero Dili bele semo bá nasaun refere.

Ministru Transporte no Telekomunikasaun (MTK), Miguel Marques Manetelo, orgullu tamba iha situasaun ida difisil Timoroan balun hanesan Lourenço de Oliveira liu husi Aero Dili hakarak halo investimentu iha setór aviasaun Sivíl.

Estadu liu husi ajensia no autoridade sira hanesan ACTL no ANATL iha para atu fasilita duni Timoroan sira ne’ebé halo investimentu iha área aviasaun nian. Tanba ne’e, laiha duvida bá Estadu no Governu atu kontinua fó apoiu bá investimentu ne’ebé Aero Dili halo.

Nia afirma hafoin tinan-21 Timor ukun an, iha aviaun ida ne’ebé tau bandeira nasionál Timor-Leste.

“Ba alin sira, aeromosa sira, koñesimentu ne’ebé imi iha tenke uza ho didi’ak, tanba Timoroan barak mós hakarak hetan oportunidade hanesan imi, mas oportunidade ne’e sira sorte seidauk too, tanba ne’e tenke hadomi servisu ne’ebé imi iha, para sai profisionál iha servisu ne’ebé imi hili,”  Ministru Miguel Marques Manetelo hateten.

“Ha’u hatene imi dalaruma sente difisil mais ita tenke hahú, parabéns bá imi hotu, nei-neik ita mós bele, loron ida ita sei mesak no ita tenke bele atu servisu iha ne’ebé de’it hodi kontribui bá dezenvolvimentu aviasaun Sivíl iha Timor-Leste,” Nia subliña.

Aero Díli kompromete Fahe Oportunidade bá ACTL no ANATL

Na’in bá Empreza Aero Dili, Lourenço de Oliveira entrega prenda bá MInistru Transporte no Komunikasaun, Miguel Manetelo. Foto/Vito Salvador

Na’in bá Empreza Aero Dili, Lourenço de Oliveira hateten, Aero Dili kontinua prepara rekursu umanu no iha fulan ne’e sei kontinua haruka tan Timoroan balun ba iha area mekánika aviasaun nian, no iha faze ida ne’e sei inklui mos mekánika husi parte ACTL nian.

“Ami husu para mekánika husi ACTL nian bele áa hotu tamba ami hetan oferta hosi Airbus diretamente ba Aero Dili ho oportunidade bá ema na’in-16 no ba Pilotu Airbus oferese mós bolsa de estudu ualu (8).” Hateten Lourenço Oliveira.

Nia hatutan Aero Dili hetan oferta ida ne’e interesante tebes bá kapasitasaun nian no koñesimentu skill nian tanba ne’e servisu hamutuk liu-liu ANATL no ACTL atu bele fó kapasitasaun bá timoroan rasik para aban bairua bele sai inspetór  no bá pilotu nian.

“Investimentu iha area aviasaun nian nunka mais hotu no sei kontinua bá oin, no presiza hotu-hotu nia servisu hamutuk,” Lourenço de Oliveira hateten.

Ministru   Miguel Marques Manetelo afirma parte hotu hatene ona katak formasaun sira, kursu sira ne’ebé Aero Dili hetan husi Airbus sei fahe mós oportunidade bá Governu liu husi ACTL tamba ne’e Governu agradese bá oportunidade sira ne’e no sei koopera di’ak liután atu kontribui bá dezenvolvimentu aviasaun Sivíl iha Timor-Leste.

“Ohin mos ita rona katak Airbus mos sei oferese tan bolsa estudu bá Timoroan sira liuhosi Aero Dili. Ita tenke aproveita oportunidade ne’ebé ema fó, husi parte Governu liuhosi ACTL no ANATL sei la’o hamutuk atu bele dezenvolve di’ak liután aviasaun Sivíl iha ita-nia rain,” Ministru Miguel Marques Manetelo hateten.

Nia dehan, ohin Timor-Leste iha aviaun ida, maibé loron ida aumenta bá rua tolu no to’o 10 sei presiza ema barak, rekursu umanu no treinamentu sira ne’ebé Aero Dili hetan liu husi oferta Airbus nian bele tulun Timor-Leste iha rekursu ida di’ak liu no sufisiente bá futuru.

Jornalista: Vito Salvadór