Hatutan.com (11 Outubru 2023), Díli—Diretór Jerál Servisu no Rejistu Notariadu, João Fernando Martins Borges, okupadu no laiha tempu atu hatán bá preokupasaun sidadaun sira nian kona-bá mekanizmu tratamentu dokumentu hanesan, Billete Identidade (BI), Sertidaun Repúblika Demokrátiku Timor Leste (RDTL), Sertidaun Kazamentu no Sertidaun Óbitu (Mate) ne’ebé tenke forma naruk, tanba deskonfia mosu funsionáriu broker iha Diresaun Munisipál Konservatóriu Servísu Rejistu Notariadu Díli.

Sidadaun sira forma hodi trata Billete Identidade (BI), Sertidaun Repúblika Demokrátiku Timor Leste (RDTL), Sertidaun Kazamentu no Sertidaun Óbitu (Mate) iha Diresaun Munisipál Konservatóriu Servisu Rejistu Notariadu Díli, Tersa (10/10/2023). Foto: Tomé da Silva.

João Fernando Martins Borges laiha tempu tanbá bainhira jornalista Hatutan.com Gloria Maia ho Tomé da Silva tenta atu halo konfirmasaun iha edifisiu Konservatóriu Servisu Rejistu Notariadu Nasionál Bebora, kona-bá assuntu ne’e, iha ninia gabinete maibé nia parte lakohi hasoru Jornalista.

Lee Mós: Forma Naruk Trata BI-Sertidaun RDTL, Tenke Investiga Funsionáriu Broker Sira

Tuir observasaun, bainhira jornalista Hatutan.com na’in-rua to’o iha sala Gabinete iha tuku 08:45 otl, jornalista diretamente hasoru funsionária ida iha Diretór Jerál nia gabinete, maibé tanba simu hela bainaka nune’e tenke hein.

Jornalista na’in-rua ne’e mós hein duni kuaze minutu 30, no iha ema na’in-haat mak tama hasoru Diretór hodi trata dokumentu balun, maibé bainhira to’o oportunidade bá jornalista Hatutan.com nian atu tama, no pessoál iha Gabitene tama bá halo konfirmasaun ho Diretór, hafoin sai mai, hato’o katak Diréror laiha tempu hasoru Jornalista tanba kontinua okupadu.

Pessoál Gabinete iha Servisu Notariadu Bebora, Kuarta (11/10/2023). Foto: Tome da Silva.

“Diretór Jerál  hateten, nia tempu laiha atu hasoru Jornalista sira tanba nia agora okupadu hela,” Direór Jerál nia pessoál Gabinete hateten ba Hatutan.com iha Gabitene Servisu Notariadu, Bebora, Kuarta (11/10/2023).

Iha Tersa 10 Outubru 2023, sidadaun sira hato’o preokupasaun katak, desde ukun an to’o ohin loron, sistema bá tratamentu dokumentu importante sira hanesan Billete Identidade (BI), Sertidaun Repúblika Demokrátiku Timor Leste (RDTL), Sertidaun Kazamentu no Sertidaun Óbitu (Mate) iha Diresaun Munisipál Konservatóriu Servisu Rejistu Notariadu Díli kontinua komplikadu tanba deskonfia mós iha funsionáriu broker sira iha diresaun ne’e mak sai impedimentu no presiza investigasaun kle’an hodi hadi’a Sistema ne’e.

Jornalista: Gloria Maia