Hatutan.com, (11 Outubru 2023), Díli—International Finance Cooperation (IFC) no World Bank iha komitmentu atu tulun Governu Timor-Leste (TL) hodi promove investimentu seitór privadu ho objetivu atu bele diversifika ekonomia TL.

Reprezentante IFC iha Timor-Leste, David Freedman hamutuk ho Bernard Harbone hosi World Bank, marka enkontru ho Prezidente Repúblika (PR) José Ramos-Horta, iha Gabinete Ex-Titulár, Galeria Memória Viva, Faról, Kuarta (11/10/2023). Foto: Tomé da Silva.

Tanba ne’e maka Reprezentante IFC iha Timor-Leste, David Freedman hamutuk ho Bernard Harbone husi Word Bank, marka enkontru ho Prezidente Repúblika (PR) José Ramos-Horta, hodi diskute kona-bá planu atu hala’o konferênsia kona-bá dezenvolvimentu ekonomia, no mós oinsá IFC no World Bank bele koopera ho Governu atu promove investimentu iha Timor.

Lee Mós: IFC Sujere Governu Dezenvolve Infraestrutura Bázika

Promove investimentu liu hosi seitór privadu atu atinji Governu nia objetivu halo diversifikasaun ba ekonomia.

“Ami nia observasaun katak, hosi parte Finansas Estadu nian, Governu iha rekursu liu husi fundu, depois seitór bankária, setór finanseiru mós iha rekursu. Maibé atu atinji objetivu katak empreza mós asesu finanseiru ita presija hala’o ho programa atu hametin baze legál ba seitór finanseiru no mós atu dezenvolve kapasidade ajensia finanseiru iha rai laran,” David Freedman hateten hafoin enkontru ho Prezidente Repúblika José Ramos-Horta iha Gabinete Ex-Titulár, Galeria Memória Viva, Faról, Kuarta (11/10/2023).

Reprezenta IFC ne’e haree katak, Governu rai hela osan iha fundu petroliferu, depois iha prosesu ne’ebé la’o hela atu dezenvolve rekusu naturais sira seluk inklui kampu greater sunrise no mós iha tempu hanesan bele promove investimentu no mós dezenvolvimentu ba seitór sira seluk.

Tamba ne’e IFC koopera hamutuk nafatin ho World Bank tanba tama iha grupu ida, kompeténsia IFC nia haree ba seitór privadu, parte ida maka koopera ho Governu atu hadi’a ambiente ba empreza no mós ambiente bá investimentu.

“Nu’udar ajensia finanseira ami mós buka oinsá bele halo investimentu ho osan rasik no mós mobiliza finansiamentu hosi fontes seluk, atu halo investimentu iha seitór privadu atu finansia empreza, setór privadu,” nia subliña.

Reprezentante World Bank, Bernard Harbone hateten, tuir Banku Mundiál nia haree kresimentu ekonómiku iha Timor Leste la’o hela maibé iha tempu hanesan World Bank preokupa katak taxa kresimentu ekonómiku ne’ebé karik la to’o no husu Governu no mós entidade sira hotu buka oinsá atu bele hasa’e kresimentu ekonomia iha Timor-Leste.

Prezidente Repúblika José Ramos Horta haree katak depois Governu foun tama, iha interese lubuk ida hosi investór sira hosi nasaun oi-oin no atu assegura katak investimentu ne’ebé ema balun konsidera hela bele akontese duni.

Jornalista: Vito Salvadór