Hatutan.com, (12 Outubru 2023), Bali—Estadu São Tomé e Príncipe hakarak atu investe hodi hadi’a kualidade ensinu superiór iha Timor-Leste (TL), liuhosi harii universidade ne’ebé di’ak iha TL.

Primeiru Ministru, São Tomé e Princípe, Patrice Émery Trovoada halao sorumutu bilaterál ho Primeiru Ministru RDTL, Kay Rala Xanana Gusmão iha sentru konvensaun Nusa Dua-Bali, Munisípiu Bandung, Provínsia Bali. Foto: GPM.

Primeiru Ministru, São Tomé e Princípe, Patrice Émery Trovoada hato’o assuntu ne’e durante sorumutu bilaterál ho Primeiru Ministru RDTL, Kay Rala Xanana Gusmão iha sentru konvensaun Nusa Dua-Bali, Munisípiu Bandung, Provínsia Bali.

Lee Mós: São Tomé e Príncipe Sei Oferese Formasaun bá Joven Timoroan iha Área Turizmu

Hafoin sorumutu, Xanana Gusmão informa, iha sorumutu bilaterál ho Émery Trovoada, Primeiru Ministru, São Tomé e Princípe ne’e, agradese tebtebes bá apoiu ne’ebé Timor-Leste fó, tanba sira hala’o konferénsia Comunidade dos Países de Lingua Portguêsa (CPLP), iha ne’ebé, Xefe estadu sira, Xefe Governu sira partisipa, no Estadu TL reprezenta hosi Prezidente Parlamentu Nasionál (PPN), Maria Fernanda Lay.

“Sira agradese tebtebes, no ko’alia oitoan katak, iha prespetiva atu harii Universidade ho Brazil. Universidade ida ne’ebé hanorin matéria ne’ebé di’ak hodi prepara jerasaun foun,” Xanana Gusmão hateten iha Otél Samabe, Nusa Dua-Bali, Munisípiu Bandung, Provínsia Bali, Kinta (12/10/2023).

“La’ós ona. Sé ita-nia universidade Katólika mós hanorin emfermájen hotu, buat sira ne’e, sira mós hanoin hela ho Brazil ne’ebé informa hela bá ita. Ne’e di’ak, ita haree took bá, tanba sira mós preokupadu tebtebes ho rekursu umanu bá futuru, tanba susar oitoan,” nia hateten.

Maski São Tomé e Príncipe ukun-aan kedan iha tinan 1975, maibé sira kbiit laiha. Komunidade internasionál sira barak bá promete bebeik, mais nafatin la hatudu iha mudansa. Hanesan Timor, USAID, Governu agora haree hela, dehan katak, sira fó apoiu barak ona bá Timor.

“Fó apou barak, ita haree bá dehan hira. Millaun $14 de turizmu, iha ne’ebé. Depois, hakarak ministra finansas atu asina ona hira tán bá. Ita dada. Primeiru, ami hakarak hatene imi nia millaun $14 bá Turizmu ne’e, iha loos ne’ebé. Ne’ebé, problema ne’e ema sei halimar,” Xanana Gusmão kestiona.

Ho kestaun hirak ne’e maka aproveita oportunidade ida-ne’e Xefe Governu hakarak hasoru-malu ho Primeiru Ministru São Tomé e Princípe hodi fó hatene bá malu katak, problema kualidade edukasaun no  problema preparasaun rekursu umanus bá future importante.

Jornalista: Rogério Pereira Cárceres