Hatutan.com, (13 Outubru 2023), Díli— Governu liu hosi Ministériu Admistrasaun Estatál (MAE) prepara ona kartau Biometric ne’ebé sei lansa iha tempu badak.

Ilustasaun kartaun Biometric. Foto Google

Ministériu Admistrasaun Estatál, Tomas do Rosário Cabral esplika, politika Governu nian hodi prodús fixa familia ho sistema online atu bele fasilita komunidade iha prosesu rejistu fixa familia no bele fasilita ekipa sira bainhira halo justifikasaun ruma kona-bá família.

Lee Mós: Kandidatu Xefe Suku Submete Dokumentu, Eleitu Sei Simu Subsídiu $250 Kada Fulan

Tanba ne’e maka, politika ida-ne’e servisu hamutuk ho Sekretariadu Tékniku Admistrasaun Eleitorál (STAE) ne’ebé kria ona kartaun eleitorál biometric, hodi bele koresponde bá prossesu pagamentu sira.

“Bainhira iha kartaun eleitór no lori ba scan. Kuandu iha pagamentu hatudu kedan la’e tanba númeru kartaun eleitorál maka ida-ne’e no tama bá fixa família ida-ne’e.  Entaun, korresponde ho fixa familia ita bele croschek ba populasaun,” Tomas Cabral hateten liu hosi konferénsia imprensa iha edifisiu Caikoli, Sesta (13/10/2023).

Razaun prodús kartaun biometric ne’e tanba MAE hetan esperiénsia hosi rai liur, hanesan iha Áfrika, no Papua Nova Guiné.

Ministru Admistrasaun Estatal (MAE) Tomas do Rosário Cabral. Foto: Tome da Silva.

“Tanba ne’e, haree bá ita nia sistema sei nafatin ho elektróniku maibé manuál hela, ne’e difikulta barkot labele le’e,” nia esplika.

Governante ne’e mós esplika katak, problema iha TL númeru ema la vota to’o 23% ne’e la’ós tanba ema la ba vota, maibé tanba la aktualiza dadus.

“Ema mate mós ita la atualiza, ema sai ba liur mós ita la atualiza, ita nia maluk sira bá rai liur mai trata de’it dokumentu atu hetan benefísiu ita la atualiza tanba ne’e mak sai razaun atu kria kartaun biometric ne’e,” nia hateten.

Polítika prodús kartaun biometric ne’e di’ak no fásil, la presiza imprime lista votantes hodi bá tau sentru votasaun ka  gasta osan ho montante bo’ot millaun $300 hodi imprime de’it lista.

“Kuandu ita ho biometric presiza de’it maka barkot ida, laptop ida, tau iha sentru votasaun tau kartaun, barkot le’e no nia publika kedan ba sentru hotu-hotu dehan katak, númeru eleitór ida-ne’e, naran ida-ne’e vota ona iha sentru votasaun,” nia esplika tán.

Oras-ne’e daudaun Governu iha faze preparasaun atu lansa kartaun biometric ne’ebé sei ajuda mós Governu hodi poupa osan no aloka fali bá dezenvolve buat seluk.

Jornalista: Leopoldina de Carvalho