Hatutan.com, (13 Outubru 2023), Díli—Tuir dadus hosi Conselho Imprensa Timor Leste (CI-TL), to’o oras-ne’e iha jornalista inkompatível ne’ebé muda ona profisaun hosi jornalista bá fali profisaun seluk hamutuk ema na’in-52, mak ofisialmente entrega ona sira nia karteira profisionál bá CI.
![](https://www.hatutan.com/wp-content/uploads/2023/05/CI-300x177.jpeg)
Karteira profisionál jornalista. Foto/Elio dos Santos da Costa.
Prezidente CI, Otélio Ote fó-sai dadus ne’e iha edifísiu CI Kintál Boot, Díli, Sesta (13/10/2023), hafoin simu atuál Sekretáriu Estadu Komunikasaun Sosiál (SEKOMS) Expedito Dias Ximenes ne’ebé mós entrega hikas ninia karteira profisionál tanba assume ona kargu públiku hanesan membru Governu.
Lee Mós: Karteira Profisionál Hanesan Identidade Hodi Hetan Konfiansa Públiku
Prezidente CI ne’e dehan, iha Lei Kominikasaun Sosiál hateten klaru, bainhira jornalista la hala’o ona knaar ka inkompatibel ona, nia iha devér atu entrega fila-fali nia karteira profisionál bá CI.
“Ba sira ne’ebé mak iha ona pozisaun seluk to’o agora seidauk hatama ne’e ita nia ekipa sira ba to’o iha sira nia fatin ona no balun mós entrega ona karta notifikasaun ba sira atu entrega fila-fali kartaun Profisionál. Bainhira a seidauk entrega, ekipa CI sei buka tuir nia paradeiru hodi foti,” Otélio Ote hateten.
Jornalista inkompativel sira ne’ebé entrega ona sira nia karteira profisional bá CI hamutuk na’in-52 mak hanesan;
- Konsellu Imprensa 11 ;
- Radio Televizaun Timor Leste, Empreza Publiku (RTTL EP) 27;
- Grupu Media Nasional (GMN) 5;
- Tatoli,IP 1;
- Televizaun Edukasaun (TVE) 1;
- Timor Post 1;
- Independen 1;
- Suara Timor Lorosa’e (STL) 1;
- The Timor News 1;
- The Oekusi post 1;
- ABC 1;
- Tempo Timor 1;
Iha fatin hanesan, Expedito Dias Ximenes hateten, nia hatene an katak agora daudaun nia la’ós ona Jornalista tanba assume ona kargu públiku hanesan membru Governu, nune’e nia mai entrega hikas karteira profisionál bá CI tuir Lei haruka.
“Ha’u mai CI atu entrega fila-fali ha’u nia karteira profisionál ne’ebé mak durante ne’e ha’u hetan hosi CI hanesan jornalista ida. Tanba ha’u muda ona pozisaun, hetan fiar hosi Primeiru Ministru atu sai membru Governu ne’ebé hola parte iha área komunikasaun sosiál nune’e ha’u tenke entrega,” Expedito Dias Ximenes hateten.
Expedito Dias Ximenes simu karteira profisionál hosi CI iha tinan 2017 no entrega hikas iha loron 13 Outubru 2023.
Tuir dadus hosi CI, dezde tinan 2017 to’o tinan 2023, Conselho de Imprensa de Timor-Leste atribui ona karteira profisionál bá jornalista sira hamutuk na’in-382.
Atribuisaun títulu profisionál jornalista ne’e bazeia mandatu Lei Komunikasaun Sosiál artigu 44 (Kompeténsia) iha alínea d) hateten, “Conselho de Imprensa mak fó, halo foun, tahan no hasai títulu profisionál jornalista nian”.
Jornalista Estajiáriu : Lazaro Pereira Quefi