Hatutan.com, (18 Outubru 2023), Díli—Bankada  KHUNTO (Kmanek Haburas Unidade Nasionál Timor Oan) iha Parlamentu Nasionál konsidera Bankada CNRT ho FRETILIN binga-malu hela iha prosesu atu halo eleisaun bá komisáriu Komisaun Anti Korrupsaun (CAC, sigla portugés).

Lee Mós: CNRT ho FRETILIN iha Ona Entendimentu bá Kandidatu Komisáriu CAC Ida

Kandidatu Komiisáriu CAC, Sérgio de Jesus Fernandes da Costa Hornai ho Rui Pereira dos Santos. Foto/repro.

Membru PN hosi Bankada KHUNTO, Luis Roberto da Silva  akresenta katak Bankada KUNTO nia haree bá komisáriu CAC ne’ebé to’o ohin loron sei pendenti hela tanba de’it CNRT ho FRETILIN seidauk iha konsensu no ida-ne’e prezudika tebes funsionamentu nornal servisu CAC nian hanesan órgaun independente bá servisu prevensaun no kombate korrupsaun iha Timor-Leste.

Deputadu Luis Roberto da Silva  bá jornalista sira iha sala Bankada KHUNTO, Kuarta (18/10/2023), hatan tanba Bankada  CNRT ho FRETILIN seidauk iha konsensu atu avansa ba eleisaun komisáriu foun CAC nian, hatudu hela katak CNRT ho FRETILIN la sériu atu kontribui bá prevensaun no kombaté korrupsaun iha país ida-ne’e.

“Kuandu ita haree bá sira-nia implementasaun sira dada kleur demais signifika katak sira-nia seriedade bá ida-ne’e laiha tuir bankada kiik sira nia haree,  sé sira haree komisáriu importante no di’ak duni bá rai ida-ne’e entaun sira nia seriedade polítiku tenke iha. Sé sira nia politíku laiha maka komesa husi VIII Governu Konstituionál no IX Governu Konstituionál ne’e mós seidauk estabelese komisáriu CAC ne’e tanba saidá? hakarak ida de’it maka ukun para atu foti tomak tiha de’it ne’e labele,” Deputadu Luis Roberto  hateten.

Komisáriu CAC ne’e proposta tenke mai husi Governu no lejitimidade ne’e maiória absolutamemte hosi Parlamentu Nasionál (PN) rasik, maibé politikamente Parlamentu Nasionál (PN) tuir Bankada KHUNTO nia haree bá partidu boot rua CNRT ho FRETILIN  sira-nia negosiasaun politíka dalaruma  la han malu.

“Ami lahatene tanba saidá ita bele dehan katak sira sei binga malu tanba uluk VIII Governu, ami nia Governu momentu sira haruka kandidatu ida mai mós CNRT la fó ulun, membru Bankada CNRT abandona PN hela de’it depois la prienxe korum plenária  depois enkontru mós sira la fó ulun, entaun karik ida-ne’e maka maluk sira Bankada FRETILIN hanoin fali ida-ne’e,” Luis Roberto hateten.

Partidu KHUNTO hakarak ezizi maka funsionamentu CAC  nune’e Timoroan sé de’it maka Governu nomeia mai presiza apoiu hotu importante maka figura ne’e servisu ho responsavél no imparsiál

Iha parte seluk Xefe Bankada PD, António da Conceição mós hatutan katak loos autór prinsipál bá iha instituisaun Comissão Anti-Corrupcão (CAC) ne’e importante. Maibe, to’o agora eidauk konsege nomeia tanba seidauk iha konsensu entre CNRT ho FRETILIN.

“Ha’u hanoin buat importante ne’ebé ita Parlamentu Nasionál (PN) hakarak atu haree hela ne’e maka konsensu ne’e para ita haree katak figura ida ne’ebá bá la’ós grupu ida ninian, maibé tenke  figura ida-ne’e konsensuál iha parlamentu  politikamente i fó kompeténsia ida-ne’e bá nia atu halo funsaun ida-ne’e,” Deputadu António da Conceição esplika.

Konsellu Ministru (KM) liuhosi proposta Primeiru-Ministru (PM) Kay Rala Xanana Gusmão submete ona bá PN naran kandidatu na’in-rua bá PN atu nomiea ka hili. Figura ka kandidatu na’in- rua ne’e mak Sérgio de Jesus Fernandes da Costa Hornai ho Rui Pereira dos Santos.

Jornalista Estajiária : Zita Menezes