Hatutan.com, (18 Outubru 2023), Abu Dhabi—Ministru Toleránsia nso Coexistência (MTC) Uniaun Emiradu Árabe (UEA), Sheikh Nahayan Mabarak Al Nahayan simu orientasaun hosi Prezidente UEA, Sheikh Mohammed bin Zayed Al Nahyan atu tau importánsia ba kooperasaun bilaterál ho Timor-Leste (TL).

Ministru Toleránsia no Coexistência (MTC) Uniaun Emiradu Árabe (UEA), Sheikh Nahayan Mabarak Al Nahayan ho ekipa simu Prezidente Repúblika, Ramos-Horta iha Otel St. Regis Abu Dhabi National Tower, Kuarta (18/10/2023). Foto: PR.

Ministru Toleránsia no Coezistensia UEA hateten, orientasaun polítika ne’ebé nia simu hosi Prezidente Uniaun Emiradu Árabe, nia hatun tan ona bá diplomata hotu-hotu Uniaun Emiradu Árabe nian atu tau importánsia ba kooperasaun bilaterál ho Timor-Leste hodi ezekuta orientasaun ne’e.

Lee Mós: UEA Promete Harii Rezidénsia Universitáriu Gratuita iha Timor-Leste

Sheikh Nahayan Mabarak Al Nahayan hato’o deklarasaun ne’e hafoin simu vizita Xefe Estadu, José Ramos-Horta ho delegasaun iha rezidénsia ofisiál no edifísiu MTC, Tersa (17/10/2023).

Iha fatin hanesan, Xefe Estadu José Ramos-Horta hateten, enkontru ho Ministru Toleránsia no Koezisténsia UEA nian no Ministériu ida-ne’e nia servisu atu hametin unidade nasionál,  toleránsia, tanba UEA ne’e halibur hosi Emiradu hitu ne’ebé uluk ketak-ketak, depois mak sira halo unifikasaun sai Estadu Federál ho nia kapitál maka Abu Dhabi.

UEA nia polítika toleránsia maka primeiru simu-malu entre Estadu federadu sira ne’ebé halibur-malu sai UEA no loke odamatan ba mundu, simu traballadór sira ne’ebé bele mai servisu no fo kontribuisaun ba dezenvolvimentu UEA nian.

UEA simu ema hotu-hotu ho fuan, laiha diskriminasaun, laiha falta respeitu, laiha mal trata ba ema hosi liur tanba ne’e ema estranjeiru sira ne’ebé mai iha ne’e kontente no halo UEA nia naran bo’ot tebe-tebes.

“Ministru Sheikh Nahayan Mabarak Al Nahayan bolu kedan nia Embaixadór lubuk ida ne’ebé servisu iha liur, oras ne’e iha UEA halo reuniaun ho membru Governu balun inklui Prezidente Parlamentu hodi ko’alia no hateten Prezidente UEA telefone ba nia atu hotu-hotu tenke tau-matan bá Prezidente Repúblika Timor-Leste tanba hanesan maun no alin ha’u nian. UEA hakarak relasaun metin ho Timor-Leste,” José Ramos-Horta hateten iha Otel St. Regis Abu Dhabi National Tower, Kuarta (18/10/2023).

Ministru Toleránsia no Coexistência (MTC) Uniaun Emiradu Árabe (UEA), Sheikh Nahayan Mabarak Al Nahayan ho ekipa simu Prezidente Repúblika, Ramos-Horta iha Otel St. Regis Abu Dhabi National Tower, Kuarta (18/10/2023). Foto: PR.

Liu hosi Ministru Toleránsia no Coezistensia, Prezidente UEA hateten nia sente kontente ho vizita Estadu ne’ebé Prezidente Repúblika José Ramos-Horta halo no UEA iha komitmentu bo’ot realiza no hametin relasaun bilaterál ho Timor-Leste.

Ramos-Horta mós konsidera vizita ida ne’e hanesan tempu furak tebes ho MTC Sheikh Nahayan Mabarak Al Nahayan, Ministru toleránsia no Coezistensia.

UAE iha ema millaun 10, hosi ema estranjeiru millaun 8. Maski nune’e UEA mak nasaun ida-ne’ebé dame no seguru liu iha mundu.

Ramos-Horta vizita fatin espirituál Abrahamic Family no museum Louvre Abu Dhabi

Prezidente Repúblika, José Ramos-Horta vizita mós fatin espirituál Abrahamic Family House ne’ebé sai hanesan fatin turizmu relijiozu reprezenta relijiaun Katólika, Sinagoga Judeu no mós mesquita Muslumanu.

“Ne’e hatudu rai ida ne’e simu relijiaun tolu ne’e di’ak loos, toleránsia relijioza as tebes, Emiradus Arabes Unidus nunka iha problema radikalizmu,” José Ramos-Horta hateten.

Museum Louvre Abu Dhabi sai hanesan Museum ida ne’ebé nakonu ho memória sira antiguidade no museum Louvre Abu Dhabi halo mós kontratu ho museum hosi nasaun França atu bele lori sasan antigu sira mai  iha ne’e durante tinan lima ka sanulu, depende ba kontratu depois fo fila fali ba França, no balun museum Louvre Abu Dhabi sosa hosi nasaun seluk iha mundu.

Jornalista: Vito Salvadór