Hatutan.com, (18 Outubru 2023), Riyadh—Prezidente Repúblika (PR), José Ramos-Horta hamutuk ho delegasaun to’o ona iha Saudita Árabia, iha provínsia Riyadh hodi partisipa iha Simeira ASEAN-Gulf Cooperation Council (GCC) ba dahuluk.

Prezidente Repúblika José Ramos-Horta to’o iha Region King Khaled International Airport, Saudita Arabia simu hosi Vise-Governadór Provínsia Riyadh Liurai Mohammed Bin Abdulrahman Bin Abdulaziz, iha Royal Terminal, Kuarta (18/10/2023). Foto: PR.

José Ramos-Horta ho delegasaun to’o iha King Khaled International Airport, Arábia Saudita, provínsia Riyadh iha tuku 15:30 oras Saudita Arábia no simu direta hosi Vise Governadór Rejiaun Riyadh Liurai Mohammed bin Abdulrahman bin Abdulaziz, hamutuk Sekretáriu Jerál Conselho de Cooperação (GCC) para os Estados Árabes Jasem Mohamed AlBudaiwi, Maijor Rejiaun Riyadh Liurai Faisal bin Abdulaziz bin Ayyaf, Diretório do Centro de Polícia da Cidade de Riade  Col. Anwareen Talab al-Maslokhi no mós Embaixadór Arábia Saudita ba Indonézia Faisal Abdullah Al-Amudi.

Lee Mós: Ramos-Horta Hala’o Vizita Ofissiál bá Emiradus Árabes Unidus no Partisipa Simeira ASEAN-GCC

Prezidente Repúblika to’o iha Royal Terminal simu ho parade militár no akompaña hosi Vise-Ministra Assuntu ASEAN Milena Rangel tuir Welcoming ceremony durante minutu lima (5) hafoin ne’e komboiu akompaña kedan delegasaun ba iha Otel Ritz-Carlton, Riyadh.

Simeira ASEAN-Gulf Cooperation Council (GCC) ba dala uluk ne’e sei hala’o iha loron 20 fulan Outubru tinan 2023 no sei involve nasaun membru sira ASEAN nian hanesan Indonézia, Malázia, Tailándia, Vietnam, Singapura, Brunei Darusalam, Myanmar, Filipina, Laos, Kambodia no Timor-Leste rasik.

Bloku Gulf ne’e kompostu hosi Arabia Saudita, Oman, Katar, Bahrain, Kuwait no Uniaun Emiradu Árabe.

Iha sorumutu ASEAN-GCC ne’e sei deskute kle’an kona-bá diresaun relasaun nasaun sira membru ASEAN-GCC.

Simeira ASEAN-GCC ne’e sei hasa’e konsiénsia públiku entre povu no seitór privadu sira iha rejiaun rua ne’e, no enkoraza troka no vizita ba negósiu no atividade ekonómiku nian, liuliu iha área turizmu médiku.

Simeira ne’e sei troka hanoin kona-bá assuntu internasionál sira no reforsa kompromisu atu mantein pás, estabilidade no seguransa rejionál sira.

Jornalista: Vito Salvadór