Hatutan.com, (19 Outubru 2023), Díli—Comissão Anti-Corrupção (CAC) liuhosi Diretór Jerál Investigasaun Kriminál, José Verdiál simu vizita hosi prokuradór Estadu Unidus America (EUA) na’in rua iha edifisiu CAC Farál, Díli, Sesta (20/10/2023), hodi fahe esperiénsia di’ak sira kona-bá Timor-Leste nia asaun no esforsu bá kombate korrupsaun iha área investigasaun kriminál nian.

Comissão Anti-Corrupção (CAC) liuhosi Diretór Jerál Investigasaun Kriminál, José Verdiál simu vizita hosi prokuradór Estadu Unidus America (EUA) na’in-rua iha edifísiu CAC Faról, Díli, Sesta (20/10/2023), hodi fahe esperiénsia di’ak sira kona-bá Timor-Leste nia asaun no esforsu bá kombate korrupsaun iha área investigasaun kriminál nian. Foto: CAC.

José Verdial partilla bá prokuradór EUA na’in-rua ne’e katak, CAC Timor-Leste nu’udár órgaun polisiál kriminál ba krime korrupsaun ne’ebé iha independénsia téknika servisu sira investigasaun nian.

Lee Mós: Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

Durante tinan 13 CAC nia ezisténsia, investigadór sira iha CAC halo servisu ho prefesionalidade no integridade iha ámbitu averiguasaun kazu sira delega hosi Ministériu Públiku (MP) sein intervensaun politikamente hosi podér polítiku sira.

Investigadór sira CAC mós la hetan intervensaun estruturalmente ba kualkér Komissáriu ho nia estrutura sira ne’ebé lidera CAC hosi mandatu primeiru to’o terseiru.

“Ami investigadór sira iha ne’e, la haree ba se mak halo korrupsaun. Ami iha prinsípiu integridade no independénsia bá kualkér kazu ne’ebé komisariu CAC delega ba investigadór, investigadór sira kumpre de’it ba Lei, hala’o servisu investigasaun nian,” Hatutan.com sita deklarasaun José Verdiál ih akomunikadu.

Ezemplu balun relasiona ho kazu boot sira ne’ebé involve membru Governu balun ne’ebé CAC investiga, konsege prosesa ba tribunál no ikus mai hatama duni ba prizaun.

CAC mós halo buska no aprensaun boot ida bá membru Governu sesante ida ne’ebé suspeita bá krime korrupsaun balun iha tinan kotuk.

Prokuradór EUA na’in-rua ne’e husu mós kona-bá dezafiu ne’ebé investigadór sira CAC nian hasoru iha servisu investigasaun kriminál nian, liu-liu bá krime korrupsaun sira ne’ebé kompleksu liu.

José Verdiál esplika katak, dezafiu ne’ebé CAC hasoru maka krime kompleksidade sira iha prossesu aprovizionamentu nian.

Dalabarak, krime korrupsaun iha área aprovizionamentu nian akontese konflitu interese boot entre podér polítiku no emprezáriu sira.

Alende partilla esperiénsia tékniku investigasaun nian ba malu, sorumutu kortezia ne’e, partilla mós bá malu dezafiu iha aspeitu politika kombate korrupsaun nian.

CAC daudaun ne’e hasoru laloran boot ba eleisaun Komissáriu CAC, hasoru hela estagnasaun no impasse bá eleisaun Komissáriu foun iha Parlamentu Nasionál (PN). Kondisaun ida-ne’e, halo CAC nia atividade investigasaun nian barak paradu.

Maski nune’e, hafoin mandatu Komissáriu sesante nia mandatu termina, CAC nafatin simu denúnsia krime sira korrupsaun nian hosi públiku hamutuk denunsia 43 no investigadór sira CAC termina ona nia averiguasaun ba denunsia 15 hodi halo auto-partisipasaun ba Ministériu Públiku.

Jornalista: Gloria Maia