Hatutan.com, (19 Outubru 2023), Díli– Asia Justice & Rights  (AJAR) Timor-Leste konsidera Ministériu Públiku (MP) ho Prokuradoria Jerál Repúblika (PGR, sigla portugés) haburas impunidade tanba la halo investigasaun no la fó kastigu bá ukun na’in sira ne’ebé envolve iha kazu krime korrupsaun no abuzu podér.

Lee Mós: Deskonfia, PGR Alfonso Lopez “Budu” Kazu Set-top Box RTTL,E.P

Diretór AJAR, Jose Luis Oliveira. Foto/Espesiál

Diretór AJAR,  Jose Luis de Oliveira, lamenta  tebes  ho servisu ne’ebé la iha seriedade no la ho transparente hosi MP ho PGR bá indísiu kazu korrupsaun no abuzu podér ne’ebé envolve autoridade ka maker ukun sira iha tempu liubá no tempu sira agora nian.

“Tuir kontituisaun RDTL, PGR maka reprezenta Estadu atu kombaté kriminozu sira, defende interese Estadu; ida mak kontra kriminozu sira, maibé faktu hatudu katak prosesu kazu krimi sira liuliu krimi sira ne’ebé maka komete hosi em-boot ka ukun na’in sira ladún la’o, ne’e la’ós de’it kazu projetu instalasaun Set-top Box Radiu Televizaun Timor-Leste, Empreza Públiku (RTTL,E.P) de’it, maibé mós kazu ministru sira balun agora laiha prosesu ida bá ida-ne’e,” José Luis de Oliveira haktuir bá Hatutan.com iha knaar fatin, Faról, Díli, Kinta (19/10/23)

Diretór AJAR, José Luis de Oliveira hateten, kazu sira ne’ebé envolve ukun na’in sira la la’o ho transparénsia iha MP no PGR hodi  hatudu momós katak instituisaun prokuradória ne’e la funsiona ho loloos  no la funsiona atu defende interese Estadu.

“Mai ha’u Prezidente  Repúblika ho Parlamentu tenke tau atensaun bá asuntu ne’e. Ita iha kazu bara-barak, sé prosesu sira ne’e la la’o signifiká katak Ministériu Públiku ka PGR haburas fali impunidade,”  José Luis de Oliveira hateten.

Impunidade katak la puni ka la kastigu ema ne’ebé komete krimi. Se nune’e. José Luis de Oliveira hateten, oinsá kompromisu Estadu nian atu kombaté  korrupsaun iha ne’ebé, kazu Set-top Box RTTL,E.P  ne’e haree hosi eis Ministru Asuntu Parlamentár no Komunikasaun Sosiál (MAPKOMS), Francisco da Costa Pereira Jerónimo envolve iha partisipasaun negosíu bá projetu ida-ne’e hodi fó benefísiu  bá ema ida-ne’e ne’ebé ké besik bá nia, ema haree hosi dook de’it ema haree tiha ona maibé prosesu laiha, ida-ne’e hatudu katak Ministériu Públiku la hala’o nia knaar ho loloos.

José Luis de Oliveira hateten, pergunta maka ne’e, PGR la hala’o nia knaar ho loloos ne’e tanbasá? Tanba interferensia politíka ka inkompetenti ka laiha kbiit.

“Ha’u hanoin tenke troka ema, tau ema ne’ebé maka hanesan iha kompromisu  forte atu kombaté korrupsaun. Labele ema hanesan ne’e mete fali politíka, dalaruma keta halo bá nia mós foer hotu karik, tanba kuandu ita foer halo korrupsaun, ita laiha forsa. Tanba ha’u mós rona katak foin daudaun nia halo viajen bá estranjeiru ne’e uza osan sala sé kuandu hanesan ne’e prezidente Repúblika, Parlamentu Nasionál la foti medida atu subtitui nia maka fó prezuizu boot bá ita nia Estadu,” José Luis de Oliveira hateten.

Nia rekomenda atu tau atensaun di’ak hosi Prezidente Repúblika, Parlamentu Nasionál (PN) atu bolu Ministériu Públiku atu husu tanbasá maka prosesu kazu korrupsaun sira ne’e la la’o, tanba hosi Komisaun Anti Korrupsaun (CAC, sigla portugés) dehan sira investiga korrupsaun bara-barak, entrega bá Ministériu Públiku maibé la prosesu bá Tribunál signifiká Ministériu Públiku promove fali impunidade hodi  kontra Estadu.

Kona-bá prosesu kazu krime projetu instalasaun Set-top Box RTTL,E.P ne’e, Hatutan.com, tenta ona halo konfirmasaun ho PGR Alfonso Lopez, Kuarta (19/10/2023), maibé PGR Alfonso Lopez rejeita fó komentáriu tanba hakarak fokus de’it bá semináriu internasionál ne’ebé PGR realiza iha Timor Plaza, Díli.

Jornalista Estajiária : Zita Menezes