Hatutan.com, (25 Outubru 2023), Díli—Parlamentu Nasionál (PN) liuhosi Komisaun C ne’ebé trata Assuntu Administrasaun Finansas Públikas, iha fulan kotuk liu hosi fiskalizasaun deskobre Prezidente Autoridade Rejiaun Administrativa Espesiál Oecusse Ambeno (RAEOA), Arsénio Paixão Bano, “fa’an” uma Estadu Área Fulolo, aldeia Sanane, Suku Costa, Sub Rejiaun Pante Makasar, bá Mari Bim Amude Alkatiri.

Prezidente Komisaun C, Cedelizia Faria dos Santos.

Alende ne’e Komisaun mós hasoru-malu hodi rona direta preokupasaun afetadu sira, tanba parte Autoridade halo duni uma neen hodi oferese bá sira atu utiliza nia valór hanesan indeminizasaun maibé tuir fiskalizasaun Komisaun C katak, uma ne’e kondisaun la di’ak no medida uma nian mós la balansu ho medida rai ne’ebé autoridade utiliza, inklui eletrisidade mós laiha.

Lee Mós: CAC Kontinua Halo Averiguasaun bá Prossesu “Fa’an” Uma Estadu Fulolo

“Rezidénsia Fulolo iha problema boot iha ne’ebá. Tuir informasaun ne’ebé sira hateten bá ami katak primeiru ne’e sira bá hela no aluga de’it. Maibé, ikus sira dehan iha fali Lei ida atu sira bele sosa hodi sai fali na’in maski osan ne’e osan Estadu. Tanba sáida mak osan Estadu nian ne’e derrepenti de’it bá halo tiha sai fali ema privadu ida nian,” Prezidente Komisaun C, Deputada Cedelizia Faria dos Santos hateten bá Hatutan.com iha PN, Kuarta (25/10/23).

Komisaun ne’e mós haree direta irregularidade katak, afetadu sira seidauk rezolve sira ninia indeminizasaun to’o ohin loron.

“Ami haree fila-fali sira dehan halo indeminizasaun bá povu. Ami bá vizita fatin ne’ebé sira halo bá povu ne’e iha uma neen. Maibé, uma neen ne’e la reboka ida. Sira halo de’it, iha laran ne’e laiha buat ida. Depois mak sira atu fó de’it ona bá komunidade atu troka ema nia rai ida ho meidada boot ne’e. Klaru katak afetadu sira la simu,” nia hateten.

Tanba ne’e PN haree katak, komunidade iha ne’ebá  iha sira nia rai, sira nia uma no toos. Bainhira Autoridade kompensa de’it ho uma ida ne’ebé la reboká, la tau simente, ahi mós laiha ho ninia fatin ne’e ki’ikoan tebes, entaun populasaun afetadu sira la .

“Uma ne’e ami haree mamuk tanba ho kondisaun ida aat loos. Ida-ne’e mak ami haree katak, problema duni. Ha’u rona ona katak, Ministériu Justisa haree ona kona-bá ida-ne’e di’ak liután, tanba ne’e violasaun boot ida,” deputada ne’e salienta.

Rekomendasaun Komisaun C nian bá Governu katak, atu buat hotu-hotu tenke halo bazeia bá Lei ne’ebé mak iha.

“Buat hotu haree fali bá Lei tanba to’o agora ami seidauk ko’alia ho Ministériu Justisa. Ami hato’o de’it ami nia relatóriu iha plenária. Ami fiar katak relatóriu ne’e sei kanaliza bá Ministériu Justisa atu haree rekomendasaun sira,” nia dehan.

Tuir relatóriu ne’ebé komisaun C aprezenta iha plenária liuhliu kona-bá reseita hosi rezidénsia Fulolo hahú hosi tinan (2017-2023) hetan $682,659.20.

Lee Mós: Arsénio Bano “Fa’an” Uma Estadu iha Fulolo bá Alkatiri

Jornalista Estajiária: Zita Menezes