Hatutan.com (26 Outubru 2023), Díli—Minsitériu Assuntu Kombatente Libertasaun Nasionál (MAKLN), propoin millaun $113 bá Orsamentu Jerál Estadu (OJE) tinan 2024.

Jornalista sira entrevista Minsitru MAKLN, Gil da Costa Monteiro ‘Oan Soru’, hafoin reuniaun Revizaun Orsamentu, iha MF, Kinta (26/10/2023). Foto: MAKLN.

“Montante Orsamentu ne’e MAKLN propoin bá programa prioridade ida maka konstrusaun jardim dos erois, verifikasaun dadus veteran sira no pagamentu ba pensaun veteranus sira.

Lee Mós: Gil “Oan Soru” Husu Bobolait Justifika Razaun Atraza Konstrusaun Monumentu 12 Novembru

“Alende programa hirak ne’e,  iha mós programa seluk ne’ebé MAKLN persiza haree iha tinan 2024 maka, levantamentu ba dadus uma lisan sira nune’e bele identifika loloos, timoroan ne’ebé maka mate hahú kedan iha tinan 1975 to’o 1999,” Minsitru MAKLN, Gil da Costa Monteiro ‘Oan Soru’ hateten iha MF, hafoin reuniaun Revizaun Orsamentu, Kinta (26/10/2023).

Dadaun MAKLN rejista ona dadus uma-ka’in 233.951, iha tinan 2024 sei halo verifikasaun hodi hatene loloos, ema hira mak mate hahú tinan 1975 to’o 1999, hodi bele valoriza no fó rekoñesimentu ba sira.

Kona-bá lista dadus naran veteranu tinan 2003 mai to’o 2009 ne’e sei halo verifikasaun, maibé bá lista dadus 2009, oras-ne’e Governu halo ona verifikasaun no sei konklui iha tinan 2024.

“Dadus veteranus ne’ebé mak pendente hamutuk 5.000-resin. Ida-ne’e ami sei haree nune’e dadus tinan 2009 nian ami sei konklui iha tinan ne’e. Maibé, atu hatene loloos ho klaru liu tenke hein tinan 2024 mak fó sai loloos,” nia hateten.

Jornalista: Gloria Maia