Hatutan.com, (30 Outubru 2023), Díli—Prezidente Repúblika (PR), José Ramos-Horta fó posse ba Brigadeiru Jenerál José da Costa “Trix” bá postu Xefe Estadu Maiór FALINTIL-Forsa Defeza Timor-Leste (F-FDTL).

Prezidente Repúblika, José Ramos-Horta fó posse ba Brigadeiru Jenerál, José da Costa ‘Trix’ nu’udár Xefe Estadu Maiór F-FDTL, iha Palásiu Prezidensiál, Bairru-Pité, Díli, Segunda (30/10/2023). Foto: Elio dos Santos da Costa.

Ramos-Horta iha diskursu hateten, Nomeiasaun bá Brigafeiru Jenerál José da Costa ‘Trix’ haree bá nia disponibilidade, kapasidade servisu.

Lee Mós: Konsellu Superiór F-FDTL Hili Trix Substitui Pedro Klamar Fuik

Trix iha espirítu, sakrifisiu no umildade ba servisu sira interese nasionál nian sai hanesan determinasaun ida atu assume responsabilidade nu’udár Xefe Estadu Maiór.

Posse bá Brigadeiru Jenerál José da Costa “Trix” nu’udár marka krusiál ida bá kontinuidade hosi kompromisu bá Defeza Seguransa no integridade nasaun nian, sai mós hanesan testamuña exelente no dedikasaun ezemplár ne’ebé Brigadeiru Jenerál Trix iha.

Trix simu posse bá funsaun no responsablidade foun ne’ebé ejizente liu no ho komplexidade hotu atu bele lori missaun ne’e ba oin.

Prezidente Repúblika, José Ramos-Horta fó posse ba Brigadeiru Jenerál, José da Costa ‘Trix’ nu’udár Xefe Estadu Maiór F-FDTL, iha Palásiu Prezidensiál, Bairru-Pité, Díli, Segunda (30/10/2023). Foto: Elio dos Santos da Costa.

“Nomeiasaun ne’e mai hosi rezultadu prosesu ida ne’ebé ho kuitadu tebes, nakonu ho transparánsia ne’ebé ejize implementasaun la’ós de’it bá mudansa iha estrutura orgánika F-FDTL nian ho ezonerasaun ba nia kargu hanesan Komandante Komponente Terrestre, maibé ida ne’e nu’udár mudansa individuál bá nia karreira militár ho servisu públiku ba povu no nasaun. Ho sira ne’e hotu Trix merese bá promosaun bá Postu Brigadeiru Jenerál,” Ramos-Horta hateten iha Palásiu Prezidensiál Nicolau Lobato Bairru-Pité, Segunda (30/10/2023).

Ho lideransa Brigadeiru Jenerál, Xefe Estadu konfia plenamente iha nia mandatu bele dinamiza servisu sira forsa defeza nian, ho esperiénsia ne’ebé forte durante funu naruk.

“Defende rigorozamente sistema integradu seguransa nasionál no fortalese aliansa ho nasaun viziñu no amigu sira hotu, espesialmente ho parseiru sira besik liu iha organizasaun rejionál Sudeste Aziatiku, iha prespetiva ida bá seguransa no kooperativa alargada,” Ramos-Horta subliña.

Trix antes ne’e dezempeña ona funsaun iha estrutura militár no assume kargu hanesan Xefe Kaza Militár to’o mai hanesan Komandante Terrestre no funsaun sira ne’e sai hanesan testamuña ba nia kompeténsia no dedikasaun ba kestaun sira seguransa nasionál.

Jornalista: Vito Salvadór