Hatutan.com, (08 Novembru 2023), Díli—Ministru Interiór (MI) Francisco da Costa Guterres, hatún ona despaxu bá Komandu Jerál Polísia Nasionál Timor-Leste (PNTL) atu halo  identifikasaun bá membru PNTL sira ne’ebé envolve iha grupu arte-marsiál (GAM) ho grupu arte-rituál (GAR).

Lee Mós: Membru PNTL Ne’ebé Involve GAM-GAR Sei Jura bá Bandeira RDTL

Primeiru-Ministru (PM), Kay Rala Xanana Gusmão rasik deklara ona atu membru PNTL ho F-FDTL sira ne’ebé envolve iha GAM ho GAR tenke identifika hotu atu bele halo juramentu bá bandeira RDTL iha loron 28 fulan-Novembru, atu serbí loos de’it Estadu no povu.

Ministru Interiór (MI), Francisco da Costa Guterres. Foto/Elio dos Santos da Costa

Ministru Interiór, Francisco Guterres, konfirma katak despaxu sai tiha ona no daudaun ne’e iha hela prosesu identifikasaun  ba membru PNTL sira ne’e no hirak ne’ebé  inklina an iha GAR ho GAM  tenei disvinkula an hosi GAM ho GAR.

“Ita sei halo juramentu iha loron 28 fulan-Novembru, bá sira hotu. Sidauk iha informasaun kona-bá membru PNTL na’in hira mak sei ba halo juramentu. Depois hau sei temi se se, pois sei forma, depois forma ona mak imi hare se-se mak iha ne’eba,” Francisco Guterres hateten bá jornalista sira iha Palásiu Governu, Kuarta (08/11/2023).

Nia esplika, juramentu ne’e nu’udár simbolu ida katak jura bá nia llealdade bá Estadu, nasaun ho povu, tanba ne’e nia haloo tiha ona despaxu halo identifikasaun membru PNTL na’in hira no iha loron  28 fulan-Novembru, sira bele halo juramentu.

“Tanba sira tenke desvinkula ka desliga  sira-nia an husi GAM ho GAR. Se nia lakohi, nia tenke hili, PNTL ka GAM-GAR. Se hili GAM-GAR entaun sai hosi PNTL, labele tama iha PNTL,” Ministru Francisco da Costa Guterres afirma.

Liga ho kazu konfrontu fízika entre juventude sira ne’ebe akontese iha iha Suku Lourba, Postu Admistrativu Bobonaro, Munisípiu Bobonaro iha loron 03 fulan-Novembru liubá, Ministru Interiór, Francisco da Costa Guterres, dehan nia parte simu ona relatóriu, maibé kona-bá kauza tanba saida ne’e sidauk bele fó  sai bá publiku tanba sei submete bá investigasaun.

“Ne’e ko’alia kona-bá segredu justisa, tanba ne’,e hau sidauk temi bá publiku kauza ne’e se mak halo. Mas, sira ne’e hotu sei presta deklarasaun hotu kona-bá kazu Lourba ho Carbau,” Ministru Francisco da Costa Guterres hateten.

Kona-bá diskunfia membru PNTL balun envolve iha konfrontu refere hodi  tiru,  Ministru Francisco tenik, sei iha prosesu investigasaun hosi Polísia Sientífika Investigasaun Kriminál.

Jornalista : Leopoldina de Carvalho