Hatutan.com, (10 Novembru 2023), Díli – Programa Monitorizasaun bá Sistema Judisiáriu  (JSMP, sigla portugés) konfunde ho servisu no knaar loloos Polísia Sientífika Investigasaun Kriminál (PCIC) tanba ne’e husu atu PCIC aprezenta relatóriu servisu ba públiku ho transparénsia.

Lee Mós: PDHJ La Tolera Bainhira Identifíka Superiór Sira PCIC Fó Pistola bá Oan Hodi Treinu

Edifisiu PCIC. Foto/Dok.Hatutan.com.

Iha Lei hateten katak pesoál sira ne’ebé mak iha PCIC tenke kaer de’it kazu ne’ebé boot hanesan violasaun sexual ne’ebé mak agravante no kazu boot sira seluk nune’e bá kazu ki’ik sira ne’e fó ba PNTL sira atu lalika hadau malu servisu, maibé tenke fahe tuir kompeténsia servisu ida-idak nian.

“Bazeia bá dezempeñu servisu PCIC nian ,JSMP labele ko’alia kle’an liu ba ida-ne’e tamba la hetan relatóriu hosi PCIC nian ne’e rasik. Ita tenke espalla relatóriu sira ho transparénsia hodi ema hotu bele haree katak sira halo duni servisu áa ida ne’e, no bele dehan mós sira rezolve duni kazu iha Timor Leste. Tamba ne’e ita lahatene krime sira ne’ebé mak PCIC atende no kada fulan ida sira atende kazu hira, hira mak sei iha faze prosesu, hira mak remata ona iha prokuradór jerál repúblika, hira mak iha Ministériu Públiku no hira mak julga iha tribunal karik relatóriu mas ami la hetan. Tan ne’e ami labele ko’alia ba sira-nia dezempeñu servisu atu servisu barak ka  lae ne’e ami labele ko’alia” Diretora Ezekutiva Ana Paula Marçal haktuir bá Hatutan.com iha edifísiu JSMP, Díli, Sesta (10/11/2023).

JSMP husu bá  PCIC atu iha fulan rua, tolu  ka neen bele mós tinan ida presiza espalla relatóriu servisu nian bá públiku hotu atu públiku bele hatene kona-bá problema sira ne’ebé mak akontese iha Timor Leste.

Tuir nia, dalan ida ne’ebé mak di’ak liu  tenke bá aprezenta bá iha parlamentu nasionál tamba PCIC nia servisu atu rezolve kazu sira ne’ebé mak boot no sériu. Depois bele fahe bá sosiedade sivil, média sira hotu-hotu inklui sira seluk atu bele hatene hare dezafiu saida mak PCIC rasik enfrenta no saida mak PCIC halo ona bá rai doben Timor Leste.

Kona-bá reforma PCIC, nia hatutan, agora adjuntu la iha ona no espera katak ida ne’e bazeia ba avaliasaun diáriu ne’ebé profunda atu hadi’a servisu sira hodi halo kontrolu ka rezolve kazu ne’ebé enfrenta daudaun. Ida reforma estrutura ne’e iha baze katak merese duni atu hasai ka troka ema atu hadi’a di’ak liu tan servisu.

“Ha’u fiar katak reforma ne’e PCIC nian ne’e iha fundamentasaun ida ne’ebé klaru katak tenke re-estrutura. Ha’u fiar mós katak sei haree ba hotu-hotu la’ós bá ema ida ka rua de’it, ida ne’ebé mak merese atu re-estrutura ita presiza,” Diretora Ezekutiva JSMP, Ana Paula Marçal dehan.

JSMP husu atu kada instituisaun hotu presiza iha fulan tolu, ne’en ka bele mós tinan ida halo avaliasaun atu haree bá dezempeñu servisu ne’e tamba liu hosi avaliasaun mak bele halo servisu ida ho kualidade no fó benefísiu mai Timor Leste.

Buat ida reforma ne’e bele la’o iha PCIC tuir JSMP nia haree ida ne’ebé mak presiza atu hadi’a duni ka iha prioridade hodi bele hadi’a, katak  labele dehan atu reforma ona kualkér ida mai troka ka hasai hotu ne’e lae, maibé JSMP husu atu liu hosi baze ruma mak avaliasaun, presiza iha fundamentasaun no relatóriu ida profunda depois mak halo re-estrutura.

“Ba PCIC nian ha’u fiar iha dadus ne’ebé klaru maibé tenke tetu didi’ak mak bele reforma. Ami momentu mós fó hanoin ona bá PCIC, maibé depende bá governu tamba nia mak iha kompeténsia másimu atu kontinua ka halakon ka transfer ba instituisaun seluk,” Nia hateten.

Iha momentu ne’ebá JSMP fó hanoin duni atu hadi’a servisu sira, maibé ikus mai dehan  re-estrutura de’it ka kontinua, tan ne’e atu troka de’it ema sira ne’ebé mak kaer pozisaun iha PCIC rasik no troka atu hadi’a servisu ida di’ak liu tan, nune’e bá servisu ida-ne’e JSMP apoiu bainhira haree servisu sira ne’ebé kontribui duni bá setor justisa.

Lee Mós: Deskonfia Irregularidade no Abuzu Podér, Vicente: PCIC La Preokupa

Jornalista Estajiáriu : Lazaro Pereira Quefi