Hatutan.com, (10 Novembru 2023), Díli—Polísia Nasionál Timor-Leste (PNTL), liuhosi Komandu Munisípiu Díli ho baze bá planu operasaun ne’ebé iha, deside hatun membru na’in-200, hodi assegura eventu komemorasaun Masakre Santa Cruz ho Loron Nasionál Juventude ne’ebé monu iha loron 12 Novembru 2023.

Primeiru Ministru (PM), Kay Rala Xanana Gusmão hasoru-malu ho Estrutura Komandu PNTL iha Sentru Formasaun Polísia Comoro, Kinta (17/08/2023).Foto: GPM.

Tinan ne’e Estadu ho Governu hamutuk ho Komité 12 Novembru, Juventude no Povu Timor-Leste tomak, komemora bá dala-XXXII no “Loron Nasionál Juventude” selebra bá dala-XVIII. Eventu istóriku ne’e hala’o iha Semitériu Santa Cruz, Díli.

Lee Mós: Jerasaun 12 Novembru 1991 Husu Sidadaun Hotu Hakaruk Bá Konstituisaun ho Lei

Komandante Operasaun PNTL Munisípiu Díli, Inspetór Xefe Polísia José Amaral haktuir, planu seguransa ne’ebé hatuun hosi Komandu Jerál PNTL bá komandu munisipiu Dili, preparadu bá seguransa iha komemorasaun loron nasionál 12 Novembru nian.

PNTL Dili sei koloka hotu ninia membru sira hamriik besik iha estrada ibun Igreja Motael nian, bainhira sai misa, sei akompaña nafatin juventude no entidade sira hotu hodi la’o ain bá Semitériu Santa Cruz.

“Iha kapitál Dili baibain ami monta seguransa na’in 200 kada loron la konta to’o kalan tanba tuir ami nia forsa ne’ebé mak iha,” Inspetór Xefe Polísia José Amaral informa durante akompaña membru sira hala’o seguransa besik Semitériu Santa Cruz, Dili, Sesta (10/11/2023).

Durante seguransa iha Dili, iha ámbitu komemorasaun eventu istóriku rua ne’e, Komandu Dili hetan mós apoiu hosi Unidade Espesial Polisia (UEP), Unidade Polisia Marítima (UPM), inklui Polísia Militár (PM), FALINTIL Forsa Defeza Timor-Leste (F-FDTL), tanba sempre apoiu komandu Dili, hala’o servisu iha kapitál nasaun nian.

Estrada protokolu sira ne’ebé membru PNTL Dili atu taka, sei la’o tuir planu seguransa ne’ebé mak molok ne’e sira hala’o iha tempu finadu ka loron matebain nian sei loke diresaun ida de’it, hosi Santa Cruz nian bá de’it, sa’e fali hosi Santa Cruz kotuk. Hosi Taibessi nian, sei la tun hosi eskola Português nian oin, maibé, tun loos nafatin iha Mota-laran.

Jornalista: Rogério Pereira Cárceres