Hatutan.com (13 Novembru 2023), Díli— Kandidatu João Baptista da Costa Belo ho Joaninha Soares Alves ne’ebé avansa bá eleisaun Segunda volta iha loron Segunda 13 Novembru tinan 2023, promete katak bainhira la hetan konfiansa hosi povu prontu nafatin atu servsiu hamutuk ho ida ne’ebé eleitu inklui estrutura suku.

Prosessu eleisaun suku Segunda volta iha aldeia Niken, Kakaulidun, suku Bairru-Pité, Segunda (13/11/2023). Foto: Leopoldina de Carvalho.

“Bainhira povu la fó fiar bá ha’u, ha’u sei simu ho laran tomak tanba demokrasia mak la’o duni hanesan ne’e. Maibé ha’u sei koopera nafatin ho xefe suku ne’ebé mak eleitu atu dezenvolve suku ne’e ba oin,” João Baptista da Costa Belo hateten bainhira halo observasaun direta bá prossesu eleisaun suku, iha aldeia Niken, Kakaulidun, Segunda (13/11/2023).

Lee Mós: Eleisaun Suku Segunda Volta iha Fatuhada La’o Di’ak

Atuál Xefe Suku Bairru-Pité no ema rezistente ne’e hetan ona fiar hosi povu iha suku ne’e durante tinan 19 no oras ne’e daudaun hetan nafatin konfiansa hodi avansa ba eleisaun Segunda volta, maibé iha elisaun ne’e nia dehan depende ba povu.

Nia mós rekoñese katak, durante nia mandatu iha buat balun la’o di’ak no balun la’o la di’ak, alnede ne’e iha servisu balun ne’ebé ladún másimu tanba apoiu ne’ebé suku ne’e simu hosi Governu ne’e limitadu.

Iha fatin hanesan, kandidata Xefe Suku Joaninha Soares Alves iha esperansa katak, sei hetan konfiansa iha Segunda volta tanba nia hanesan kandidata Xefe Suku feto únika.

“Kompetisaun iha lakon no manán. Tanba ne’e labele ta’u fali fuan katak lakon ne’e hanesan ódiu vingansa ida. Tenki simu realidade ida ne’ebé kuandu lakon. Maibé importante maka nafatin servisu hamutk ho objetivu ida de’it hakarak hadi’a suku ne’e,” atúal Xefe Aldeia Fuslam, Suku Bairru-Pité, Joaninha Soares Alves hateten.

Joaninha prontu kandidata-an ba xefe suku hodi halakon diskrimanasaun no prespetiva hosi públiku kona-bá partisipasaun feto iha dezenvolvimentu katak feto laiha direitu atu ukun. Labele hanoin feto ida sai lideransa nia labele halo buat hotu, lei ne’e garante ba ema hotu-hotu.

“Depende ba lideransa, se feto ida bá ho domin ho fuan tanba saida mak komunidade labele apoia,” Joaninha ko’alia ho fiar an.

Observasaun Jornalista Hatutan.com iha sentru votasaun sira ne’ebé pertense bá suku Bairr-Pité la’o normál, eleitór sira la dudu-malu, no laiha forma naruk hanesan eleisaun primeira volta.

“Eleisaun segunda ronde ne’e iha diferensa tanba primeira volta ne’e ita mai vota forma naruk no kleur. Agora ne’e ema menus loos no prosesu lalais de’it,” Eleitór aldeia Fuslam, Francisco da Costa hateten bá Hatutan.com.

Suku Bairru-Pité ho total aldeia 26, abitante hamutuk 34.000, eleitrores 20.949.

Iha eleisaun primeira ronde iha Xefe suku hamutuk 251 mak hakat bá eleisaun segunda volta iha loron ohin 13 Novembro 2023 tanba iha eleisaun primeira volta la atinje 50+1.

Jornalista: Leopoldina de Carvalho