Hatutan.com, (14 Novembru 2023), Díli– Eleisaun órgaun suku segunda volta termina ona, Segunda, 13 fulan-Novembru 2023. Nune’e, nia rezultadu apurtamentu finál mós kuaze fó sai hotu ona, hanesan mós iha Suku Comoro, Postu Administrativu Dom Aleixo, Munisípiu Díli.

Lee Mós: Kandidatu Xefe Suku Eligio José Marçal Lidera iha Sentru Votasaun 30 Agostu-Comoro

Xefe Suku Comoro, Eligo José Marçal kaer liman ho ekipa apuramentu finál eleisaun órgaun suku segunda volta, 14 Novembru 2023. Foto/Gloria Maia

Iha apuramentu finál eleisaun segunda volta órgaun suku Comoro nian, hatudu kandidatu xefe suku ho númeru sorteiu 1 Eligio José Marçal  eleitu ho votu konfiansa hosi eleitór hamutuk 5.778.

Eurico Guterres, hanesan xefe suku sesante ne’ebé re-kandidata an hetan de’it votu 4.652. Enkuantu total votu validu iha 10.430, votus nulu 53, votus branku 10, nunee total eleitór iha Suku Comoro ne’ebé partisipa iha eleisaun ne’e  10.494, eleitór sira neebé la tuir iha segundu volta hamutuk 15.665 husi total eleitoral 26.159.

Tuir mai rezultadu kontajen votu iha sentru votasaun 14 ne’ebé pertense bá Suku Comoro iha eleisaun órgaun suku segunda volta nian.

Tuir rezultadu kontájen votu nian iha Sentru Votasaun 14, ne’ebé mak pertense bá área Suku Comoro nian mak hanesan;

Sentru Votasaun Sede Aldeia 12 de Outubru, kandidatu númeru sorteiu (1) Eligio José Marçal   , ho totál 1046, kandidatu númeru sorteiu (2) Eurico Guterres hetan votu 562.

Sentru Votasaun Sede Aldeia Golgota, kandidatu númeru sorteiu (1) ho totál 511, kandidatu númeru sorteiu (2), 204.

Sentru Votasaun Sede Aldeia 04 de Setembru, kandidatu númeru sorteiu (1), ho totál 817, kandidatu númeru sorteiu (2), 410.

Iha Sede Aldeia 30 de Agosto, kandidatu númeru sorteiu (1), ho totál votu 967, kandidatu númeru sorteiu (2), 242.

Sentru Votasaun Sede Aldeia Moris-Foun, kandidatu númeru sorteiu (1), ho totál votu 844, kandidatu númeru sorteiu (2), 538.

Sentru Votasaun Sede Aldeia Fomento 1, kandidatu númeru sorteiu (1), ho totál votu 218, kandidatu númeru sorteiu (2), 330.

Sentru Votasaun Sede Aldeia Fomento 2, kandidatu númeru sorteiu (1), ho totál votu 343, kandidatu númeru sorteiu (2), 268.

Iha Sede Aldeia Fomento 3, kandidatu númeru sorteiu (1), ho totál votu 121, kandidatu númeru sorteiu (2), hetan 385.

Sentru Votasaun Sede Aldeia Baia Leste, kandidatu númeru sorteiu (1), ho totál votu 114, kandidatu númeru sorteiu (2), hetan 224.

Sentru Votasaun Sede Aldeia São José, kandidatu númeru sorteiu (1), ho totál votu 143, kandidatu númeru sorteiu (2), hetan 436. Iha Sede Aldeia Ramelau D, kandidatu númeru sorteiu (1), ho totál votu, 145, kandidatu númeru sorteiu (2), hetan 200.

Sede Aldeia Ai-mutin, kandidatu Eligio Marçal, ho totál votu 467, no Eurico da Costa de Jesus, hetan 179. 

Aldeia São Miguel, Eligio Marçal, ho totál votu 113, no Eurico da Costa, hetan votu 149. Iha Sentru Votasaun Sede Aldeia Posto Penal, Eligio Marçal, ho totál votu 163, no Eurico da Costa de Jesus, hetan 259.

Perfíl Badak Xefe Suku Eleitu Eligio José Marçal

Eligio José Marçal, moris iha Munisípiu Liquiça, iha loron 12 fulan-Setembru tinan 1976. Nia nu’udár kaben hosi Marçelina Freitas Ximenes Marçal, hosi Munisípiu Baucau.

Daudan ne’e Eligio José Marçal halao knaar hanesan dosente iha Institutu of Busnise (IOB). Eligio José Marçal  ho Marcelina Freitas Ximenes Marçal iha oan feto na’in-tolu ne’ebé oras nee dadauk halao hotu estudu iha Portugál.

Eligio José Marcal, sente haksolok tanba bá dalauluk, komunidade fiar nia hodi lidera suku Comoro, kompostu hosi  aldeia 14 ne’ebé konsidera  area jurizdisaun luan uitoan.

“Ha’u mai laos atu ukun, ha’u mai atu serbí, tanba ema hotu apoia ha’u tenke kandidata an bá eleisaun órgaun suku n’ee, liu husi saída maka ha’u halo ona iha igreja, tanba durante ne’e ha’u organiza atividade hotu iha parokia Comoro nian, entaun sarani barak maka koñese ona ha’u,” Eligo  José Marçal hateten bá Hatutan.Com, iha sede Suku Comoro, Tersa (14/11/2023).

Eligio hato’o saída maka durante motiva nia atu kandidata an bá xefe suku maka hakarak kontínua serbí iha sosiedade no iha igreja.

Eligio mós sai hanesan Xefe Foska, xefe akolitus, Eskuterus, no xefe agrupamentu Ainkariña Parokia Comoro nian, hanesan mós konsellu pastoral no grupu seluk sira neebé nia organiza liga ho igreja nian.

Jornalista: Gloria Maia