Hatutan.com, (15 Novembru 2023), Bobonaro—Prezidente Autoridade Munisípiu Bobonaro, Ernesto de Oliveira Barreto husu bá Governu sentrál atu reativa merkadu tradisionál ne’ebé lokaliza iha área fronteira, suku Batugede, postu administrativu Balibo, munisípiu Bobonaro ne’ebé la funsiona desde pandemia Covid-19.

Merkadu tradisionál iha Fronteira Batugade, ne’ebé transforma tiha bá sentru izolamentu Covid-19. Foto/Rogério Pereira Cárceres.

Ernesto de Oliveira Barreto  husu atu reativa tanba bele halo prevensaun bá atividade komérsiu illegal iha fronteira no tinan bá tinan la rezolve.

Lee Mós: Inaugura iha 2012, Funsionamentu Merkadu Fronteira Batugade Laiha Serteza

Autoridade munisipál ne’e konsidera reativasaun merkadu tradisionál ne’e mak sei redús atividade komérisu illegal no bainhira la reativa, Governu bele destaka hotu membru FALINTIL Forsa Defeza Timor-Leste (F-FDTL) ho Polisia Nasionál Timor-Leste (PNTL) iha fronteira mós sei la rezolve atividade illegal tanba fronteira terrestre ne’e lu’an liu.

“Hakarak ka lakohi tenke reativa merkadu iha fronteira. Sé ita la reativa ne’e ita labele fó sala bá ita nia parte seguransa. Ho prezensa merkadu tradisionál ne’e bele rezolve no redús atividade ilegál,” Ernesto de Oliveira Barreto, rekomenda.

Prezidente Autoridade Munisipiu Bobonaro ne’e  rezeita katak, merkadu tradisionál iha fronteira ne’ebé to’o oras-ne’e la funsiona ne’e la’ós tanba problema má-jestaun, maibé tanba pandemia globál Covid-19 iha mundu no da’et to’o Timor-Leste.

Merkadu tradisionál fronteira Batugade inaugura iha loron 07 fulan-Fevereiru 2012 hosi Prezidente Repúblika  (tempu ne’ebá), José Ramos-Horta, momentu ne’ebá Primeiru-Ministru, Kay Rala Xanana Gusmão, Ministru Turizmu Komérsiu no Indústria, Gil Alves (matebian) no Vise Ministru Finansas, Rui Manuel Hanjam no to’o agora merkadu ne’e laiha serteza bá ninia funsionamentu hanesan merkadu.

Uma bá merkadu ne’e konstrui ho Orsamentu Estadu ho fasilidade balun, maibé la utiliza tuir nia natureza hanesan merkadu loloos atu fasilita komunidade iha postu integradu fronteira Batugade.

Nune’e, iha tempu pandemia Covid-19, infrastrutura no fasilidade merkadu refere transforma tiha bá sentru izolamentu bá pasiente sira ne’ebé iha sintoma Covid-19.

“La’ós jestaun la di’ak. Loloos merkadu funsiona tiha ona, maibé Oitavu-Governu mós halo hela planu ida ne’e. Mais tanba de’it Covid ne’e mak paradu tiha,” Ernesto de Oliveira Barreto ko’alia bá Hatutan.com iha Sidade Liberdade Balibo, Postu Administrativu Balibo Vila, Munisipiu Bobonaro, Kuarta (15/11/2023).

“Merkadu fronteira nakfilak bá Karantina, ne’e la’os kestaun bá ita. Ita iha Maliana rai luan no ita hein mak osan de’it. Osan kuandu iha ona, rai iha atu bele uza bá harii merkadu,” nia hateten.

Nia haktuir, iha tinan kotuk, autoridade munisipál hala’o enkontru ho embaixadór Repúblika Indonézia, Sahat Sitorus durante loron ida tomak no hafoin sorumutu sira tun kedan bá haree direta kondisaun reál merkadu tradisionál iha fronteira Batugade.

“Iha bazár fatin ne’e ami haree no nia mós promete atu loke merkadu tradisionál hodi bele atende populasaun rai rua ne’e nian,” PAM Bobonaro Ernesto Barreto, haktuir.

Maibé, iha tempu ne’ebá embaixadór ne’e dehan, sei lori fali planu ne’e bá to’o iha Jakarta hodi halo diskusaun iha Konsellu Ministru tanba tuir planu sira-nian, atu konstrui ka harii mós ponte iha sira-nian fronteira, sira halo no Timor-Leste mós halo maibé to’o agora ninia rezultadu seidauk iha.

Jornalista: Rogério Pereira Cárceres