Hatutan.com, (16 Novembru 2023), Díli- Tribunál Judisiál Primaria Instánsia Díli (TJPID) liu husi Juis koletivu, Juiza Edita Palmira dos Reis, Juiza Francisca Merques no Juis José Celestino Quintão,  kontinua hala’o julgamentu bá  eis Konsul Jerál Timor-Leste nian bá Estadu Nova Gales dos Súl, Sidney-Austrália, Luciano Valentim da Conceição “ Timor Maubere”, hasoru eis Ministra Negósiu Estranjeiru no Kooperasaun (MNEK), Adaljiza dos Reis Magno, relasiona deklarasaun eis MNEK nian katak, eis konsul troka konta bankária.

Lee Mós: Tribunál Adia Julgamentu Kazu Luciano Timor Maubere vs Adaljiza Magno

Kontinuasaun  julgamentu,  Kinta (16/11/2023), TJPID aprezenta testemuña Lídia Soares, hanesan eis Primeira Sekretaria Konsul Jerál Timor-Leste bá Estadu Nova Gales dos Súl, deklara katak  iha  loron 28 fulan-Janeiru tinan 2019, nia hahú ba hala’o misaun iha Sidney.

Hahú fulan-Janeiru too Setembru tinan 2019 transferénsia orsamentu operasionál la’o normal bá iha bankária Finansa MNEK nian, nune’e orsamentu bá kobre atividade, transporte  no pulsa sira la falta. Maibé, tuir nia,  durante fulan lima nia laran, hahú iha loron 20 fulan-Outubru tinan 2020  to’o fulan-Fevereiru tinan 2021, orsamentu operasionál la tama ona, no sira nia parte la iha koñesimentu razaun saída maka osan ne’e la tama.

“Ami husu finansa MNEK nian, sira hateten osan transfere ona, maibé ami la simu, iha fulan-Marsu tinan 2021, osan foin tama, ami husu razaun, husi parte Diresaun Finansa MNEK  informa katak, osan durante ne’e la tama tanba konta bankária ofisiál nee troka ona, maibé realidade ami rona hosi eis konsul dehan la troka,” Lídia Soares deklara perante audnesia julgamentu.

Eis Primeira Sekretaria ne’e fó tan sasin katak, depois  nia parte rona deklarasaun hosi Eis Ministra MNEK, liu husi Televizaun katak, Konta Bankária ne’ebé maka iha hetan troka ona, nune’e halo nia konfuzaun no konsidera la loos tanba normálmente konta bankária ofisiál ne’e so bele troka hosi Finansa MNEK nian, tanba sira maka halo, ho ida ne’e diplomata se de’it laiha autorizasaun ka laiha kompeténsia  muda konta bankária tuir sira nia hakarak.

Iha akuzaun ne’ebé lee sai husi Juiza Palmira dos Reis iha audiénsia julgamentu ne’e katak, iha indikasaun alende eis konsul troka konta bankária, iha mós akuzasaun katak, eis konsul jerál Luciano Timor Maubere  muda enderesu, ho nune’e afeta bá iha orsamentu operasionál la tama durante fulan lima.

Nune’e sasin ne’e hatán katak, ne’e laloos, tanba momentu Eis konsul Jerál Luciano timor Maubere  atu muda enderesu ne’e, liu husi asina kontratu ho parte relevante sira, iha fulan-Agostu tinan 2019, iha momentu ne’e transferénsia osan no halo pagamentu bá fatin ne’ebé hela bá la’o normal hela, nune’e iha karta ne’ebé mensiona klaru, nune’e karta ne’e nia parte haruka mai iha MNEK, karik atu halo pagamentu, tenke bazeia bá karta ne’e, realidade pagamentu la’o di’ak.

“Hafoin fulan-Setembru osan hahú la tama, tanba ne’e alojamentu osan operasaun nian ami uza dei’t ami nian, ha’u la lembra osan hira mak ami hasai, maibé depois de osan tama, osan hirak ne’e devolve fali bá ami nia osan ne’ebé antes ami uza ona,” nia relata.

Sasin husi Eis Inspetór Jerál MNEK, Danilo Soares mós deklara katak, hosi tranzasaun osan operasionál iha primeiru no segundu ne’e buat hotu la’o normál, maibé tranzasaun ikus ne’ebé ate to’o sai problema ne’e maka hatudu kode ida la hanesan (kode enderesu antes no foun).

Ho nune’e, sira nia (Inspetór Jerál MNEK) parte halo kedas investigasaun bá Finansas, hafoin parte finansa relata katak, kode transferénsia bá dala tolu nian diferente ho kode transferénsia dahuluk no daruak nian.

“ Ami husu parte finansa sira hato’o katak, kode enderesu foun seidauk tama Fi finansa Central nian, ho nune’e iha loron 27 fulan-Dezembru 2020, ami re-chek, foin halo update iha 2021 ne’e hahú la’o di’ak ona, falla ne’e iha ema ne’ebé maka responsavel halo karta ne’e, laiha informasaun kona-bá mudansa enderesu,” nia hato’o.

Iha nia sasin mós haktuir realidade ne’ebé maka iha durante nia hala’o servisu to’o problema ne’e to’o tribunál, bazeia bá deklarasaun eis Ministra MNEK Adaljiza Albertina Magno nian katak eis konsul jerál troka konta bankária ne’e.

Rona tiha sasin sira-ne’e, Juiz koletivu deside adia audiénsia julgamentu no kontínua rona sasin iha loron 23 fulan-Novembru 2023, iha oras 11:00otl.

Bá prosesu audiénsia julgamentu ne’e, autór Luciano Timor Maubera hetan asisténsia legal  hosi Defensor Públiku, Sergio diaz Quintas, no reprezenta  reu Adaljiza Albertina Magno Prokuradór Alfeu Morreia.

Jornalista: Gloria Maia