Hatutan.com, (17 Novembru 2023), Díli-Abitante sira, Sesta dadeer (17/11/2023), hahú hein no husu informasaun direta  iha edifísiu Servisu no Rejistu Notariadu iha Bebora, Díli, atu bele trata sira idaidak nia pasaporte.

Lee Mós: Semana ne’e, Pasaporte 16.000 To’o TL

Abitante sira tuur hein hela iha salaun Servisu no Rezistu Notariadu hodi trata sira-nia pasaporte, Sesta (17/11/2023). Foto/Tome da Silva

Tuir observasaun Hatutan.com nian, iha edifisiu Servisu no Rejistu Notariadu haree katak, sidadaun sira hahú hakbesik aan no balun tuur hein iha salaun Rezistu Notariadu hodi hein tekniku funsionariu Notariadu ne’ebé halo atendimentu bá nesesidade trata pasaporte nian.

Pessoal funsionariu Notariadu nian ida informa, dadauk ne’e Servisu Rezistu Notariadu atende deit sidadaun sira ne’ebe molok hatama ona dokumentu, agora hein  foto no hein foti deit ona pasaporte iha lorokraik tuku rua.

“Bá atendimentu publiku maka  sei iha loron 22 fulan-Novembru 2023, agora ne’e ami atende deit sira ne’ebe hatama ona dokumentu antes, agora sira mai hasai sira nia foto para tuku 14.00 Otl, sira fila mai foti deit ona pasaporte, bá nesesidade  urzente ka la urzente ne’e ami la hatene tanba superior sira maka bele ko’alia,” informa pesoál funsionariu ne’e bá Hatutan.com.

Iha fatin hanesan, sidadun Fandiano Soares Martins hateten, iha semana kotuk hatama dokumentu sira atu trata pasaporte, maibe rezultadu funsionariu sira ne’ebe halo atendimentu informa, Tersa liubá maka mai foti, maibe nafatin laiha rezultadu, haruka fila-fali dehan iha Sesta ohin.

“Ohin ami konsege mai, no rezultadu iha duni, sira bolu ami nia naran tama bá hasai foto, tuku 14.00 Otl, ami mai fali atu foti pasaporte se oras ida la konsege, Segunda maka ami mai fali,” Fandiano Soares Martins hateten.

Abitante sira tuur hein hela iha fati trata pasaporte nian Servisu Rezistu Notariadu atu trata sira-nia pasaporte, Sesta (17/11/2023). Foto/Tome da Silva

Nia husu Servisu Rezistu Notariadu trata pasaporte ho lalais, tanba sidadaun ne’e rasik hanesan estudante bolseiru, nune’e labele extende tan ona, tanba ida ne’e bele fo inplikasaun negativu bá sira nia oportunidade estudu.

Bainhira Hatutan.com atu konfirma asuntu ne’e detallu liutón ho Diretor Jeral Servisu Rezistu Notariadu, João Fernando Martins Borges, maibé nia pesoál gabinete informa katak, diretór sei halo enkontru ho funsionáriu tanba ne’e seidauk bele atende jornalista sira.

Governu liuhosi Ministériu Justisa, Kinta (16/11/2023), transporta ona kuantidade kaderneta pasaporte hamutuk rihun 16 to’o iha Timor-Leste  no bele hahú halo atendimentu bá públiku iha loron 22 fulan-Novembru 2023.

Jornalista: Gloria Maia