Hatutan.com, (24 Novembru 2023), Díli—Hafoin partisipa forum internasionál bá negósiu iha Díli, iha ona emprezáriu internasionál hamutuk sanulu (10) mak konkorda atu hahú halo sira-nia investimentu ne’ebé mak sei kobre bá seitór oioin iha Timor-Leste (TL).

Vise-Primeiru Ministru no Ministru Koordenadór Assuntu Ekonómiku no Ministru Turizmu no Ambiente, Francisco Kalbuadi Lay.

Forum internasionál ne’ebé hala’o ho tema sentrál “Timor-Leste International Business Forum 2023” ho sub-tema “Discovering Blue and Green Oportunities for Sustainable Investment”, durante loron rua, 23 to’o 24 fulan-novembru 2023, iha konkluzaun finál ne’ebé rezulta duni katak, empreza internasionál hamutuk 10 mak hakarak duni atu loke sira-nian investimentu iha TL.

Lee Mós: Governu Sei Promove Turizmu TL Iha “Forum Internasionál Ekonomia”

Ho prontidaun hosi emprezáriu sira ne’e, ikus mai hamosu duni akordu ida hodi selebra ho Governu Timor-Leste, “Government to Government” no akordu balun entre Bisnis ho Bisnis  ka Business to Business.

Doadór hosi Hongkong liuhosi Empréza Goldway Holdings Limited, sei apoia karreta hamutuk 12 bá Ministériu Turizmu no Ambiente, hodi hala’o servisu turizmu nian tuir nesesidade.

Governu Timor-Leste mó sei simu apoiu doasaun konstrusaun ospitál 1 hosi empreza Guangdong Guofengyuan Holding Group. Empréza Wenchang Heng Ye Industrial Co., Ltd, sei oferese Programa Bolsa Estudu 200 bá Timroan sira.

Empréza Guangdong Lufeng Jinghai Industrial Co., Ltd, komprometidu atu harii uma ho unidade hamutuk uma-ka’in 20 mai povu TL. Empreza Guangdong Beilin Energy Ekipament Co. Ltd, sei oferese 2 unidade hosi bomba mina-rai.

Iha biban ne’e, Câmara Comercio e Indústria Timor-Leste (CCI-TL), asina mós akordu ho Empréza Carbon Foundation Country hosi Austáalia. Nune’e mós empréza PT Dewata Sukses Bersama ho Suhurama Developer Unipessoal Lda iha área kriasaun bá Manu-tolun (Peternakan ayam petelur).

Hosi Associação Emprezarial das Mulheres de Timor-Leste (AEMTL), asina ho empreza Shenzen Hesun Supply Chain Service Co,Ltd iha área peskas. Alende ne’e, AEMTL selebra ona mós akordu ho Jardine Botanical SDN,Bhd iha área cosmetic industry.

Iha selebrasaun akordu hirak ne’e, asiste direta hosi sasin sira mak hanesan, Prezidente Hongkong Goldway Holdings Limited, Wong Kan Lek, Prezidente Guangdong Guofengyuan Holding Group, Haiyuan Li, Prezidente Wenchang Heng Ye Industrial Co., Ltd., Tsoi Chor, Prezidente Guangdong Lufeng Jinghai Industrial Co., Ltd., Zheng, Prezidente Guangdong Beilin Ekipamentu Enerjetiku Co., Ltd., Jianhuai Lin.

Hosi IX Governu konstitusionál Timor-Leste nian, liuhosi Ministru Planeamentu ho Investimentu Estratéjiku (MPEI), Gastão de Sousa, Ministru Obras Públikas (MOP), Ministru Komérsiu Indústria (MKI), Filipus Nino Pereira, inkuli Vise Primeiru-Ministru, Ministru Koordenadór bá Asuntu Ekonómiku nian, Ministru Turizmu no Ambiente.

Francisco Kalbuadi Lay esplika, akordu ne’ebé selebra dadaun ne’e, la’ós dehan akordu ida ne’ebé atu hakesi, maibé, hothotu ho intensaun ida konkretu, ksolok tebes katak, emprezáriu nasionál sira, balun konsege konkista duni sira-nian parseiru hosi liur, investór sira mai hosi internasionál, ne’ebé ohin, hamutuk ho Governu asina tán MoU sanulu (10).

“MoU ida ne’e mak doasaun kareta 12. Ospitál ida ho mós bolsu estudu bá ema 100 bá iha Xina, liu-liu bá iha área ne’ebé espesiálidade hanesan Otelária, ospitálidade, nune’e mós eskola médiu sira hanesan tékniku sira, oioin de’it,” Kalbuadi hafoin forum internasionál, Sesta (24/11/2023).

Governante ne’e esplika, akordu ida ho karáter bisnis ka negósiu, komérsiu indústria ninian hosi Xina, sira mai ho ema hamutuk 50 resin, sira harii involve aan hamutuk iha asosiasaun ida ne’ebé maka hothotu prontu atu kontribui.

La’ós ne’e de’it, sira mós komprometidu atu harii Otél Cinco Estrela (Bintang lima) iha TL, nomós harii sentru konvensaun ho standarte internasional nian no kompletu mós ho área oioin, inkluzivamente restaurante sira estrela bá estrela.

Ida seluk fali, asina mós hamutuk ho ministru komérsiu indústria nian, ida maka atu kuda tohu, sira servisu bá ida ne’e.

Hosi parte seluk mós iha área aviasaun ninian, ohin asina tiha ona señor Lourenço ho señor ida mai hosi Indonézia. Depois, iha tán Sohu, hosi Xina, iha tán Peska, ne’e mós mai hosi Xina duni.

“Hosi Singapura mak asina rua no Malázia asina ida bá Kosmétika, bá fábrika kosmétika. Ne’ebé, hamutuk ita dehan katak, maizumenus. Ita foin hahú hetan fiar hanesan, ita sei halo tán kontaktus, halo tán atividades hanesan ne’e, atu maluk sira mai hosi liur, bele komesa hetan fiar, no atrai sira, atu hakarak duni halo investimentu iha Timor-Leste,” Kalbuadi Lay, hateten.

Jornalista: Rogério Pereira Cárceres