Hatutan.com, (24 Novembru 2023), Díli—Investór Internasionál UNILUMIN GROUP CO.,LTD hosi Xina, ne’ebé partisipa forum Busnies Internasionál iha Díli, ezije Governu hadi’a infraestrutura iha Timor Leste (TL) nune’e bele atrai liu tán investór hosi nasaun seluk mai investe.

Diretora Internasionál Departemen UNILUMIN GROUP CO.,LTD, Wu Sha. Foto: Gloria Maia.

Diretora Internasionál Departemen UNILUMIN GROUP CO.,LTD, Wu Sha hateten, bainhira to’o iha Timor-Leste,  nia parte haree katak, Governu persiza tebes atu investe makaas iha área infraestrutura, tanba haree Timor iha poténsia boot no iha forum ne’e bele loke liu tán investór sira nia haree nunee bele investe makaas ba rai ne’e nia di’ak.

Lee Mós: Governu Sei Promove Turizmu TL Iha “Forum Internasionál Ekonomia”

“Ami nia prezensa iha forum ida-ne’e hanesan oportunidade. Ami haree ona situasaun real iha Timor-Leste. Tanba ne’e atu dada liu tán investór Internasionál sira mai investe maka Governu tenke hadi’a duni infraestrutura sira iha rai laran,” Wu Sha hateten hafoin partisipa Forum Busnies Internasional, Sesta (24/11/2023).

Nia mós louva Governu Timor-Leste ne’ebé esforsu makaas atu dezenvolve nasaun ida-ne’e, liu hosi vizita no foti esperiénsia lubuk hosi kompañia sira nasaun Xina nian.

Hafoin partisipa forum ida-ne’e sei asina MoU ho Governu Timor-Leste liu hosi Vise Primeiru Ministru no Ministru Koordenadór Asuntu Ekonómiku, Francisco Kalbuadi Lay, atu apoia eletrisidade no hadi’a dalan, hodi fasilita populasaun Ataúro.

“Horiseik ami vizita Ataúro, fatin furak tebes. Maibé, eletrisidade laiha no kondisaun estrada la di’ak. Tanba nee ami sei asina MoU atu oferese eletrisidade (tenaga surya) hamutuk 1.000 no hadi’a dalan bá populasaun Ataúro,” nia hateten.

Jornalista: Gloria Maia