Hatutan.com (24 Novembru 2023), Baucau— Sentru Saúde iha Postu Admistrativu Quelicai, munisípiu Baucau enfrenta problema barak liu.

Sentru Saúde iha Postu Admistrativu Quelicai, munisípiu Baucau. Foto: Leopoldina de Carvalho.

Xefe Sentru Saúde Quelicai, medíku Salomão Salestiano Gama informa, nesesidade importante iha sentru saúde ne’e hanesan bee-moos laiha difikulta tebes atividade saúde nian.

Lee Mós: Sentru Saúde Osso-Queli Presiza Kama Partus

“Bainhira tempu udan mak ita foin dada bee hosi komunidade ne’ebé dada ona bee bá sira nia uma. Maibé, kuandu bailoron ne’e bee laiha. Situasaun ne’e prezudika tebes inan partus sira,” Salomão Salestiano Gama  hateten iha Baucau, Kinta (23/11/2024).

Alende problema bee moos, fasilidades saúde hanesan ambulánsia mós menus, tanba sentru saúde Quelicai kobre área lu’an ho ambulánsia multifunsaun ida de’it.

“Ita kobre suku 15, dala ruma pasiente na’in-rua kedan mak telefone dala ida, ne’e ita labele atende. Tanba ne’e, dala barak sira ne’ebé hela iha área remotas leva de’it mai to’o iha sentru saúde,” nia hateten.

Situasaun susar liu bainhira iha tempu udan, dala ruma udan boot halo dalan la di’ak, entaun ambulánsia labele bá, dala ruma mós ambulánsia bá halo manutensaun kleur, entaun pessoál saúde sira labele halo buat ida.

Xefe Sentru Saúde Quelicai, medíku Salomão Salestiano Gama. Foto: Leopoldina de Carvalho.

Preokupasaun seluk mak hanesan laiha sala maternidade, pessoál saúde sira obrigadu didin de’it sala balun hodi bele halo atendimentu bá inan isin-rua.

Sentru Saúde Quelicai iha postu saúde 6, hosi númeru ne’e postu saúde tolu mak laiha médiku hanesan Lelalai ho Boalale, Makalaku.

“Tanba ne’e presiza aumenta rekursu umanu, tanba médiku menus liu. Ami kobre área lu’an, no daudun ne’e iha éediku 5 de’it. Kada sentru saúde na’in-ida, ami mós la’o tuir oráriu. Entaun, atendimentu susar,” nia relata.

Sentru Saúde Quelicai ho nia postu saúde hamutuk 6 no pessoál saúde hamutuk 50, inklui estajiadu sira. Totál pessoál saúde permanente hamutuk 20. Postu admistrativu Quelikai, iha suku 15 ho totál aldeia 59.

Jornalista: Leopoldina de Carvalho