Hatutan.com, (27 Novembru 2023), Díli—Reflesaun misa agradesimentu loron proklamasaun unilaterál independénsia bá dala-48 iha Parókia Sagrado Coração de Jesus Becora maka, Independénsia loloos maka povu Timor Leste tenke moris iha ksolok nia laran.
![](https://www.hatutan.com/wp-content/uploads/2023/11/Proclamasaun-Independensia-300x221.jpeg)
Proklamasaun Unilaterál Independénsia Timor Leste Nian 28 Novembru 1975. Foto espesiál.
“Objetivu loloos hosi ukun-an maka povu tenke moris iha ksolok no kondisaun bá ksolok ida-ne’e tenke mai hosi ukun-na’in ne’ebé iha domin no responsabilidade bá povu ida-ne’e,” Selebrante misa agradesimentu, Vigáriu Jerál Dioseze Maliana, Padre Lúcio de Deus sita reflesaun iha omilia, Segunda (27/11/2023).
Lee Mós: Governu Tau $500.000 bá Serimónia Komemorasaun Loron Proklamasaun Independénsia
Ksolok ida-ne’e maka sai hanesan Reinu Maromak Nian bá povu ne’ebé nia hadomi, laiha ema ida iha mundu ne’ebé hakarak moris terus, desde ema ne’e nia moris, nia hakarak de’it mak ksolok no kondisaun bá ksolok ida-ne’e tenke mai hosi nia rasik no mai hosi ema ne’ebé ukun hodi garante ksolok no prosperidade.
Padre Lúcio sita katak, Maromak Nia Futar Liafuan ne’ebé sani iha loron ohin fó-hanoin kona-bá moris profétiku ne’ebé líder sira tenke hatur iha ukun nu’udár intervensaun Maromak Nia liman-ain iha povu nia leet, bainhira povu hasoru problema, lakon sira nia dignidade no ksolok, ukun-na’in tenke halo esforsu atu fó hikas povu nia ksolok liu hosi ukun ne’ebé povu oferese.
Hotu-hotu reza iha Santa Missa ida-ne’e atu Maromak Nia intervensaun bá Timor Leste nia istória, nune’e hotu-hotu valoriza istória ida-ne’e hodi kontinua kontribui bá nasaun ne’e ho Maromak Nia tulun no bensaun, atu haraik espíritu matenek ba ukun na’in sira, demokrasia buras atu kada tinan lima ukun na’in sira ukun povu ho domin no responsabilidade.
“Maromak fó fatin di’ak bá eroi sira hotu iha Lalehan, tau-matan bá povu doben Timor-Leste no perdua hahalok aat sira ne’ebé halo hodi moris la tuir promessa ne’ebé hato’o bá Maromak,” konklui omilía ho hamulak.
Partisipa iha missa agradesimentu ne’e Prezidente Tribunál Rekursu, Deolindo dos Santos, Vise Primeiru-Ministru bá Asuntu Sosiál no Dezenvolvimentu Rurál, Mariano Assanami Sabino, Ministru Administrasaun Estatal, Tomás do Rosário Cabral, líder nasionál Lere Anan Timur, Rui Maria de Araújo inklui entidade sira sivíl no militár, estudante sira, sarani no povu Timor-Leste.
Jornalista: Vito Salvadór