Hatutan.com, (26 Novembru 2023), Díli—IX Governu Konstitusionál lansa ona projetu konstrusaun ponte ligasaun komunidade área Kasnafar, Suku Manleuana, Díli ho Kunsing, Suku Bobolelo, Postu Administrativu Laulara, Munisipiu Aileu,  ne’ebé sei gasta $3,632.896.18.

Serimónia lansamentu projetu konstrusaun ponte Kasnafar-Kunsing, Sábadu (25/11/2023).Foto: Elio dos Santos da Costa.

Vise Primeiru-Ministru, Ministru Koordenadór bá Asuntus Ekonómikus no Ministru Turizmu ho Ambiente, Francisco Kalbuadi Lay dehan, durante ne’e ema hotu-hotu liu bá mai Dili-Aileu no munisipiu sira seluk, dalan ne’e mak sempre difikulta, tanba laiha ponte no susar liu tán bainhira udan boot, mota mós tun.

Lee Mós: Dezeñu Ponte Foun Becusse Konkluídu no Entrega Ona bá ADN

Tanba ne’e, IX Governu ne’ebé lidera hosi Primeiru-Ministru, Kay Rala Xanana Gusmão no liuhosi Ministru Obras Públikas (MOP), Samuel Marçal ho Ministru bá Planeamentu no Investimentu Estratéjiku (MPIE), Gastão Sousa ne’ebé mak iha esperiénsia barak ona, hakarak asselera projetu ne’e hodi fasilita di’akliu tán movimentu komunidade.

“Ha’u fiar katak, ponte ne’e sei di’ak duni. Haree ohin kedan mós sira mai hahú ida-ne’e, ha’u hakfodak,” Francisco Kalbuadi Lay hateten iha intervensaun durante serimónia lansamentu projetu konstrusaun ponte Kasnafar-Kunsing, Sábadu (25/11/2023).

Reprezentante autoridade Postu Administrativu Laulara, Munisipiu Aileu, liuhosi Xefe Suku Bocolelo, Januário Guterres de Deus, agradese bá Governu, tanba bele hahú konstrui ponte ida-ne’e, hodi fasilita komunidade sira ninian konetividade.

“En-nome xefe suku Bocolelo ne’ebé mak besik iha mota ninin la-haluha hato’o agradese wain bá Governu, liuliu bá Primeiru Ministru, Kay Rala Xanana Gusmão ne’ebé orienta lalais halo ponte ida-ne’e. Obrigadu barak,” nia agradese.

Projetu Kasnafar.

Senior Manajer iha Kompañia Karya Timor-Leste, Evaristo Soares Guterres agradese bá Governu ne’ebé lidera hosi Primeiru-Ministru, Kay Rala Xanana Gusmão no bele fó fiar bá sira atu halo konstrusaun bá ponte ida-ne’e, durante fulan-12.

“Ami hosi kompañia, halo posível atu hamenus hosi tinan ida nia laran, sé laiha udan boot, ka laiha mota-boot, ami esforsu atu buat ne’e bele hotu lalais,” nia promete.

Bainhira ponte ne’e hotu, sei fó benefísiu bá komunidade sira ne’ebé hela besik iha área ne’e, nune’e mós populasaun hotu hosi munisipiu oioin, sira mós bele utiliza hodi halo konetividade.

Maske nune’e, parte kompañia, husu mós Governu atu halo akompañamentu nafatin bá sira-nia servisu, ajuda nafatin atu apoia buat sira ne’ebé naun-tékniku sira ne’e hodi bele aselera projetu ne’e tanba dala-ruma iha mós fatór barbarak bele afeta bá buat sira ne’e hotu.

Evaristo Soares Guterres afirma, ho lansamentu ida-ne’e, hosi ohin bá oin kompañia servsiu daudan ona. La’ós aban tán, tanba mákina sira ne’e sei estasiona no halo nafatin servisu to’o projetu ne’e konklui.

Projetu konstrusaun ponte ne’e ho nia naruk metru 70, luan metru 11. Kompañia mós fó tán adisionál metru 10 bá Governu, nune’e ponte ne’e nia naruk hamutuk metru 80.

Jornalista: Rogério Pereira Cárceres