Hatutan.com, (28 Novembru 2023), Díli—Reprezentante lia-na’in no kultura, Eugénio Sarmento konsidera inisiativa no esforsu hosi instituisaun balun atu halo legalizasaun no mós lokalizasaun bá Servisu Sex Komersiál nian,   kulturalmente sei estraga imajen Timor Leste nian ne’ebé ninia povu maioria moris ho relijiaun Katólika no sósiu kulturál.

Lia-na’in, Eugénio Sarmento. Foto: doc Eugénio Sarmento.

Deklarasaun ne’e hodi hatán bá esforsu hosi Institutu Nasionál Kombate Moras HIV/SIDA (INKSIDA) ne’ebé oras-ne’e daudaun buka dalan oinsa hetan legalizasaun bá servisu ne’e ho razaun atu bele redús númeru ema ne’ebé afetadu bá HIV/SIDA.

Lee Mós: Servisu Sex Komersiál Eziste, INKSIDA Esforsu Legaliza no Lokaliza

“Ha’u laiha kompeténsia atu ko’alia kona-bá Servisu Sex Komersiál, maibé bainhira legaliza, ninia vantajen maka bele kontrola no halo atendimentu saúde atu labele habelar moras HIV/SIDA no desvantajen maka hanesan nasaun Maioria Katólika sei sai imajen ida ne’ebé ladi’ak bá públiku. Kona-bá ida-ne’e péritu sira mak tenke halo peskiza no parte kultura ami fó de’it opiniaun,” Eugénio Sarmento hateten bá Jornalista Hatutan.com hafoin partisipa selebrasaun loron Proklamasaun Independénsia bá dala-48 iha Palásiu Prezidensiál Bairru-Pité, Tersa (11/28/2023).

Lia-na’in ne’e mós rekoñese katak, Servisu Sex Komersiál ne’e la’ós buat ida foin akontese, maibé buat ne’e akontese ona dezde pré-istória, katak antes Cristo buat ne’e iha ona.

Maibé, hanesan ema Timor ho ninia kultura, ninia tara-bandu ho nian norma sira ne’ebé kuandu akontese buat sira hanesan ne’e, fó sala malu ne’e todan.

Hosi prespetiva seluk, Eugénio Sarmento mós haktuir katak, Servisu Sex Komersiál ne’e mosu tanba fatór ekonomia no mós fatór família, entaun iha kontestu Timor nian bele rezolve ho buat seluk no la’ós ho legalizasaun no lokalizasaun.

Jornalista Estajiária: Zita Menezes