Hatutan.com, (29 Novembru 2023), Díli—Diresaun Nasionál Rekursu Umanu no Lojistika iha Ministériu Koordenadór bá Assuntu Ekonómiku, Ministériu Turizmu no Ambiente (MKAE-MTA), sei kumpre notifikasaun hosi Vise Primeiru-Ministru no MKAE-MTA, Francisco Kalbuadi Lay hodi la estende funsionáriu kontratadu 300-resin iha Ministériu ne’e.
![](https://www.hatutan.com/wp-content/uploads/2023/11/Deolindo-Ximenes--300x176.jpeg)
Diretór Nasionál Rekursu Umanu no Lojistika, MKAE-MTA, Deolindo Ximenes. Foto: Tomé da Silva.
Diretór Nasionál Rekursu Umanu no Lojistika, Deolindo Ximenes hateten bá Jornalista Hatutan.com iha knaar fatin edifísiu MKAE-MTA Mandarin, Kuarta (29/11/2023).
Lee Mós: Kalbuadi Sei Hapara Duni Funsionáriu Kazuál IP-EP Tuteladu Iha MKAE-MTA
Deolindo Ximenes haktuir, funsionáriu 300-resin ne’e sira nia estatutu hanesan kontratadu no sira nia kontratu sei remata iha 31 Dezembru, nune’e bazeia bá notifikasaun Ministru nian sei la halo renovasaun bá kontratadu ne’e.
“Bazeia bá notifikasaun Nú 045/VPM-MKAE/MTA/XI/2023, Díli 17 Novembru 2023 hosi Ministru Fransisco Kalbuadi Lay katak la’ós atu hapara maibé kontratu termina. Signifiká sira nia kontratu remata iha 31 Dezembru 2023. Funsionáriu kontratadu sira ne’ebé servisu iha Diresaun sira ne’ebé tutela liuliu iha Ministériu Turizmu no Ambiente,” Deolindo Ximenes klarifika.
Tuir dadus hosi Diresaun Nasionál Rekursu Umanu no Lojistika iha Ministériu Koordenadór bá Assuntu Ekonómiku, Ministériu Turizmu no Ambiente (MKAE-MTA) katak, funsionáriu kontratadu ne’ebé sei la estende kontratu mai hosi diresaun sanulu-resin ho totál 300-resin.
Nia esplika, notifikasaun ne’e klaru katak sei termina iha loron 31 Dezembru 2023 no sei la halo renovasaun.
![](https://www.hatutan.com/wp-content/uploads/2023/11/Deolindo-Ximenes-ok-300x220.jpeg)
Diretór Nasionál Rekursu Umanu no Lojistika, MKAE-MTA, Deolindo Ximenes. Foto: Tomé da Silva.
“Ita ko’alia kona-bá kontratu ne’e depende bá nesesidade ministériu nian. Bainhira ministériu presiza no orsamentu iha bele kontinua. Maibé, desizaun ministru nian katak termina, ami parte tékniku jestaun sira ne’e kumpri de’it hodi hatutan notifikasaun ne’e bá funsionáriu kontratadu sira atu kumpre,” Deolindo Ximenes haktuir.
Bainhira husu kona-bá polítika Ministériu nian karik sei integra hikas funsionáriu hirak ne’e bá diresaun seluk tanba sei aumenta dezempregu iha rai laran, Deolindo Ximenes hatán katak, kestaun hapara funsionáriu kontratadu hirak ne’e sei aumenta duni dezempregu maibé ida-ne’e superiór másimu nia desizaun.
Diresaun sira ne’ebé tutela iha MKAE-MTA mak hanesan tuir-mai:
- Gabinete Inspeção Geral dos Jogos
- Gabinete dos Auditoria Interna
- Direção Geral do Turizmo
- Direção Nasionál de Dezemvolvimentu Turistico
- Direção Nasionál Empreendimento Atividades e Produtos Turistico
- Direção Nasionál de Promoção Turistica e Relações Internacionais
- Direção Nasionál de Turizmo Comunitário e Cultural
- Direção Geral do Ambiente,
- Direção Nasionál e Biodiversidade,
- Direção Nasionál do Cotrolo de Polução
- Direção Nasionál para Alteração Climatica
- Centro da Educação e Informação Ambientál,
- Gabinete Jurídico e Prossecução Ambiente,
- Direção Nasionál Planeamento Finanças e Administração
- Direção Nasionál de Aprovisionamento,
- Direção Nasionál do Recurso Humanos e Logistica
Iha sorin seluk, funsionáriu kontratadu ida ne’ebé lakohi temi naran, hato’o nia lamentasaun katak tuir loloos Ministru labele foti desizaun ho emoasaun hodi estende ninia kontratu tanba bainhira la estende maka nia sei sai duni dezempregu.
“Ha’u hanoin katak, desizaun ida ne’e politiku liu. Loloos labele no tenke tetu tanba ami ema barak liu sei sai dezempregu,” funsionáriu kontratadu ne’e hateten bá Hatutan.com.
Nia konta tuir katak, iha uma nia de’it mak serbisu ho nia oan na’in haat eskola hotu inklui ninia subriñu na’in-rua mai hosi munisípiu eskola iha Díli nia mak fó han.
Bainhira hakotu kontratu, Timoroan nee sei enfrenta problema liuliu nesesidade uma laran nian tanba nia laiha abilidade seluk atu halo.
Nia rekomenda bá Governu atu bele tetu situasaun ne’e bainhira atu foti desizaun hodi la estende kontratu funsionáriu kontratadu sira ne’e tanba maioria ho situasaun hanesan.
Jornalista Estajiária: Zita Menezes