Hatutan.com, (28 Novembru 2023), Díli—Prezidente Repúblika (PR), José Ramos-Horta fó parabéns bá Xefe Suku eleitu iha eleisaun suku 2023 ne’ebé ohin simu posse no husu Governu atu tau osan apropriadu ba atividade sira iha suku ne’ebé bele fó benefísiu direta bá povu, husu mós atu redús osan bá Deputadu sira iha Parlamentu Nasionál.

Xefe suku eleitu na’in-26 bá periudu 2023 to’o 2030 simu posse iha resintu administrasaun Munisipiu Díli, Tersa (28/11/2023). Foto: Tomé da Silva.

“Xefe Suku sira ne’ebé ohin simu posse, parabéns. Há’u admira tebtebes ho Xefe suku sira tanba barak mak ema di’ak loos no há’u kontaktu bei-beik sira. Balun ha’u fó laptop hodi ajuda sira nia servisu,” Ramos-Horta hateten iha Palásiu Prezidensiál Nicolau Lobato Bairr-Pité, Tersa (28/11/2023).

Lee Mós: Ramos-Horta Kontra Alterasaun Estatutu Deputadu Ne’ebé Fó Benefísiu Ezazeradu bá Elite Polítiku Sira

Ramos-Horta akompaña  Xefe Suku balun no haree ho matan rasik katak, sira servisu iha momentu hotu-hotu atu tulun komunidade, balun halo servisu iha tempu inundasaun, hadi’a estrada ne’ebé aat kauza husi dezastre ruma, hadi’a komunidade nia uma, nia konsidera katak, ne’e hatudu autoridade lokál sira nia matenek no vizaun forte bá sosiedade.

Nia fó ezemplu konkretu hanesan Xefe Suku iha Fatuahi, bainhira inundasaun halo estrada monu, sira mesmesak mak hadi’a depois mak Xefe Estadu  fó tulun oituan ba sira, fó osan ruma atu selu kamioneta lori rai henek ho fatuk hosi mota Comoro to’o Fatuahi, sira halo servisu rasik ho kualidade.

“Xefe Suku balun iha kapasidade no inisiativa di’ak loos, ema sira ne’e mak abut bá demokrasia, abut bá Estadu nian. Governu tenke haree, envéz fó osan barak liu bá deputadu sira, haree mós oinsá orsamentu di’ak liu bá xefe suku sira,” Ramos-Horta subliña.

Ohin Timor-Leste selebra loron proklamasaun unilaterál independénsia bá dala-XLVIII, haree ba bem estár povu nian, Xefe Estadu observa katak to’o agora ki’ak sei barak demais.

Tanba ne’e, nia dehan problema ki’ak barak demais, maibé fallansu ida mak tenke simu, lideransa sira tenke simu, no Ramos-Horta iha esperansa katak, ho lideransa  Primeiru Ministru Kay Rala Xanana Gusmão nia matenek iha tinan lima mai númeru ki’ak bele tun.

Jornalista: Vito Salvadór