Hatutan.com, (29 Novembru 2023), Díli—Reprezentante professór kontratadu na’in 1.499 aprezenta sira nia preokupasaun bá Primeiru-Ministru (PM), Kay Rala Xanana Gusmão kona-bá kontratu ne’ebé besik remata ona.

Reprezentante professór kontratadu na’in 1.499 aprezenta sira nia preokupasaun bá Primeiru-Ministru (PM), Kay Rala Xanana Gusmão kona-bá kontratu ne’ebé besik remata ona. Foto: Media GPM.

Professór kontratadu hirak ne’e kontrata hosi VIII Governu Konstitusionál iha 13 Abril 2023 no tenke termina iha 31 Dezembru tinan ne’e.

Lee Mós:Reklamante 3.000-resin, MEJD Verifika Hela Professór Voluntáriu “Mate-Klamar”

Reprezentante professór kontratadu na’in-16 lidera hosi Konselleiru, Agustinho Soares hanesan Eis Diretór Nasionál bá Dezenvolvimentu Parke Eskolár, iha Ministériu Edukasaun hasoru Xefe Governu iha Palásiu Governu, hodi husu tulun atu rezolve problema ne’ebé daudaun ne’e sira hasoru.

Rona tiha preokupasaun hirak ne’e, Xefe Governu koordena ho professór sira hodi hala’o vizita bá Ministériu Edukasaun, hodi hato’o direta sira-nia problema bá Ministra Edukasaun no Sekretáriu Estadu.

Infelizmente Ministra Edukasaun laiha fatin tanba hala’o hela viázen hosi Postu Administrativu Maliana, mai Dili, Nune’e Sekretáriu Estadu Ensinu Sekundáriu Jerál no Tékniku Vokasionál, Domingos Lopez Lemos hamutuk ho dirijente sira ministériu nian ho assesór sira mak atende enkontru ne’e.

Iha enkontru ne’e, Xefe Governu husu bá reprezentante professór sira ne’e hato’o sira nia kestaun bá Sekretáriu Estadu no dirijentes, hafoin Konselleiru Agustinho reprezenta professór sira hodi fó sai sira nia kestaun rua (2).

“Ida, husu atu mantein kontratu bá professór kontratadu 1.499, tanba Ministériu Edukasaun atu hapara sira nia kontratu iha fin-Dezembru tinan ne’e. Rua, sita hosi dekretu lei 31 maiu 2023, ko’alia kona-bá ingressu espesiál ne’ebé hetan ona promulgasaun hosi Prezidente Repúblika, maibé to’o agora seidauk realiza no la inklui professór kontratadu 1.499,” Hatutan.com sita komunikadu.

Haree bá kestaun rua ne’e, Xefe Governu hatán katak, avaliasaun sempre halo hodi avalia métodu ensinu professór sira-nia prossesu no progressu ensinu.

Xefe Governu mós fó korázen bá professór sira atu ho pasiénsia no kontinua hanorin, tanba eskola harii bar-barak presiza profressór atu bele prienxe.

PM Xanana husu professór sira proibidu atu involve an iha Grupu Artes Marsiais no karik mak xefe Governu ne’e hatene katak, professór sira balun tama arte marsiais, sei asina karta hodi esklui hosi nia kna’ar nu’udár professór, tanba realidade hatudu katak, bainhira professór ida tama iha organizasaun Arte Marisiál, sei fó impkatu la di’ak bá estudante sira. Xanana afirma katak, Profesór sira nia misaun mak atu serbí la’ós fatin buka servisu.

Xanana hameno bá Ministra Edukasaun atu labele foku liu bá programa Merenda Eskolar, maibé fó prioridade bá kuantidade no kualidade professór sira no kompeténsia ministériu edukasaun nian maka, rezolve problema professór kontratadu 1.499 to’o fulan Janeiru 2024.

Iha loron 23 Novembru 2023, reprezentante Professór kontratadu hirak ne’e mós hasoru malu ona ho kamisaun G iha Parlamentu Nasionál ho ninia membrus aira atu hato’o preokupasaun ne’e espesifikamente manorin kontratadus iha 2023 ne’ebé agora daudaun ne’e laiha soluasaun.

Konselleiru professór kontratadus, Agustinho Soares hateten professór hirak ne’e iha faze interpretasaun maibé iha tendénsia boot atu ba faze eskluidu maibé seidauk iha konkluzaun finál.

Agostinho Soares husu bá Prezidente Komisaun G ho nia membru sira atu tau atensaun ba assuntu ida ne’e tamba PN iha podér boot liu maka podér politika atu oinsa hamutuk ho Governu fó sujestaun di’ak ba assuntu ne’e.

Kona-bá ne’e Prezidente komisaun G, Deputadu Armando dos Santos Lopez heteten, Komisaun sei haree atu halo audiénsia ho parte Ministériu Edukasaun atu rona esplikasaun hodi bele fó rekomendasaun ruma.

Jornalista: Rogério Pereira Cárceres/Estajiáriu Lazaro Pereira Quefi