Hatutan.com, (04 Dezembru 2023), Díli—Parlamentu Nasionál (PN), liu hosi Komisaun G ne’ebé trata assuntu Edukasaun, Juventude, Kultura no Sidadania, durante hala’o fiskalizasaun iha eskola sira identifika implementasaun merenda eskolár, haree katak, hahán ne’ebé Governu oferese antes ne’e ho de’it $0,25 di’ak liu fali agora daudaun hasa’e ona bá $0,42 bá kada estudante.

Edifísiu eskola Ensinu Báziku Centrál (EBC) Filiál Lafaek Mutin iha aldeia Rai-mate, suku Asulau Sare, Postu Administrativu Hatulia, Munisípiu Ermera, ne’ebé konstrui hosi komunidade. Foto/Hatutan.com.

Tanba ne’e Prezidente Komisaun G, deputadu Bankada PD, Armando Lopez sei hato’o assuntu ne’e bá Ministru Administrasaun Estatál (MAE) atu halo klarifikasaun bá implementasaun ne’e.

Lee Mós: MEJD La Hatama “Kanuru Tohar” Bá Implementasaun Merenda Eskolár

“Realidade hahán ne’ebé oferese bá alunu sira kompara ida uluk $0,25 ne’e di’ak liu fali $0,45. Eskola balun ne’ebé ami bá vizita, ami konversa ho alunu sira, sira dehan sira so’e hahán tanba hahan la di’ak. Sira dehan uluk dika liu no agora aat loos,” Armando Lope hateten iha plenária PN, Sesta (01/12/23).

Iha fatin hanesan, Prezidente Komisaun A ne’ebé trata asuntu Lejizlasaun no Justisa, deputadu Patrocinio Fernandes mós haktuir katak, Komisaun A identifika duni irregularidade iha implementasaun merenda eskolár.

Tanba ne’e nia husu bá MAE katak, tenke iha ona mekanizmu foun atu bele halo kontrolu ne’ebé di’ak liu tán.

“Tanba ami mós detekta iha munisípiu balun iha mal utilizasaun osan bá merenda eskolár nian. Iha ne’ebá envez uza bá merenda eskolár maibé uza fali bá buat seluk. Ne’ebé, ha’u hanoin tinan oin tenke iha kontrolu di’ak liu bá buat sira ne’e,” Patrocinio Fernandes hateten.

Deputadu Patrocinio Fernandes mós haktuir problema merenda eskolar hanesan materia ida edukasaun nian mais depois tanba delegasaun politika ne’ebé delega ona bá Munisípiu sira

Hatan kona-bá preokupasaun ne’e, Ministru Administrasaun Estatál, Tomas do Rosário Cabral hateten, delegasaun kompeténsia hahú hosi $0,25 no $0,42 no hahú hosi tinan 2017 mai oin, autoridade munisípiu no administradór sira mak uza sistema free balance no administradór munisípiu sira servisu hamutuk ho Ministériu Edukasaun iha eskola sira hodi diretamente bá kotrola iha área remota no postu-administrativu.

“Merenda eskolár ita haree hosi nia implementasaun, ita kompara ho $0,25 sae bá $0,42 haree bá kotuk ne’e sasan sira nia folin sei bele kontrola. Agora sa’e bá $0,42 maibé sasan mós folin iha merkadu sa’e. Entaun ita sei haree kestaun ne’e,” Tomas Cabral hateten hafoin halo audiénsia ho Komisaun A, C, D, G iha PN (01/12/23).

Jornalista Estajiária: Zita Menezes