Hatutan.com, (05 Dezembru 2023), Díli—Klubu Voleiból AD SLB Laulara Feto no mane sai kampiaun iha liga Voleiból Timor-Leste primeira divizaun époka 2023, hafoin halakon adversáriu klube Choque iha finál.

Prezidente Klubu Voliból AD SLB Laulara, Kay Rala Xanana Gusmão foto hamutuk ho jogadór sira hafoin serimónia atribuisaun prémiu ba manán nain sira iha kompetisaun liga Voleiból Timor-Leste époka 2023 ne’ebé hala’o iha Ginaziu Díli, Tersa (05/12/2023). Foto: Elio dos Santos da Costa.

Klubu Voleiból AD SLB Laulara liu hosi nia jogadór sira ekipa Feto manán adversáriu Choque ho skore 3-0, no ekipa mane mós halakon sira nia adversáriu ho skore ne’ebé hanesan.

Lee Mós: Manán Aitana FC 4-3, AD SLB Laulara Mantein Iha Primeira Klasifikasaun LFTL

Iha jogu ekipa Feto entre Klubu Voleiból AD SLB Laulara no Choque, ekipa rua hatudu jogu ida atrativu tamba ekipa rua mai ho kombinasaun Jogadór sira selesaun nasionál no mós Jogadór estranjeiru sira ne’ebé klubu kontrata.

Durante jogu, ekipa AD SLB Laulara domina liu jogu no nia jogadór ne’ebé hola pozisaun hanesan setter ka toser sempre asegura bola no oferese ba jogadór sira ho pozisaun Spiker ka smash hodi hatama bola ba adversáriu no uaihira ekipa AD SLB Laulara lakon bola jogadór sira ne’ebé ho pozisaun bloker sempre hola pozisaun atu bele asegura pontu iha tabela.

Ekipa Voleiból CHOQUE mós mai ho ekipa ida forte ne’ebé maiória jogadór foin-sa’e ho talentu ne’ebé kapas no hatudu jogu ida furak no atrativu maibé lakon bola no oportunidade nune’e AD SLB Laulara domina liu jogu.

Iha jogu set primeiru ekipa rua iha balansu maske nune’e AD SLB Laulara mak iha liu sorte hodi manan jogu set primeiro. Kontinua ba set segundu AD SLB Laulara kontinua ukun no termina set terseiru ho vitória ne’ebé lori ekipa AD SLB Laulara ba kampiaun.

Tama ba ekipa mane, animu adeptus sira iha tribun Ginaziu Dili haklalak hodi fo apoiu ba sira nia ekipa favoritu.

Iha gogu ba ekipa mane maiória adeptos tau esperansa ba klubu Voleiból Choque mak sei sai kampiaun maibé iha realidade oinseluk tamba ekipa AD SLB Laulara konsege halakon nia adversáriu ho skor 3-0.

Bainhira jogu hahu, ekipa Choque  liu husi nia Spiker ka smash sira lansa kedas atake ba adversáriu AD SLB Laulara no rezultadu hatudu iha set primeiru hahu Choque  ukun maibé too iha jogu nia klaran AD SLB Laulara domina hikas no manan set primeiru.

Tama ba set segundu ekipa rua konsege iha forsa ne’ebé hanesa ho skor 24-24 nune’e arbitu ne’ebé lidera jogu deside fo Deuce (Yus 2) dala rua no ikus mai AD SLB Laulara kontinua manan iha set segudu no kontinua ba set terseiru AD SLB Laulara kontinua lidera no ikus mai sai kampiaun ba liga Voleiból Timor-Leste primeira divizaun époka 2023.

Hafoin jogu Primeiru-Ministru, Kay Rala Xanana Gusmão ne’ebé mós nu’udár Prezidente Klube Voleiból AD SLB Laulara hateten imi lalikan husu no imi tenke kompriende katak kontente tamba manan.

Nia afirma mesmu sai kampiaun AD SLB Laulara tenke kontinua prepara na nafatin, tamba ohin iha jogu hatudu katak ekipa Voleiból Choque mós kapas tebe-tebes, no iha desportu lakon no manan sempre iha, ohin manan aban bele lakon nune’e mós ohin lakon aban bele manan.

“Ne’ebé ita atu fó parabéns ba jogadór sira hotu no klube sira hotu ne’ebé lori sira nia Jogadór partisipa iha liga Voleiból ne’e. Ita hatene todan ituan klube atu moris, susar tebe-tebes ne’ebé fo parabéns ba sira hotu, hahu kedas husi sira ne’ebé la manan premiu too sira ne’ebé kampiaun,” Kay Rala Xanana Gusmão hateten hafoin serimónia atribuisaun prémiu ba manan nian sira iha kompetisaun liga Voleiból Timor-Leste époka 2023 ne’ebé hala’o iha Ginaziu Díli, Tersa (05/12/2023).

Xefe Governu ne’e mós enkoraja ba Jogadór sira iha kada klube Voleiból ne’ebé eziste iha Timor-Leste atu prepara na no kontinua treinu hodi kontribui ba dezenvolvimentu desportu iha Timor-Leste liu-liu iha modalidade Voleiból.

Entertantu, Jogadór mane husi ekipa Voleiból Choque Jefranio da Silva Neves hateten iha jogu ohin adeptus sira hakarak Choque  mak manan no sai kampiaun maibé iha realidade oinseluk tamba ekipa iha kampu halo esforsu maibé rezultadu mak lahetan dunik.

“Sente triste tamba ami nia klube Voleiból Choque  lakon mais ne’e la problema tamba bele sai hanesan lisaun ida para ami bele hadia diak liután iha tempu tuir mai.” hateten Jefranio da Silva Neves.

Jogadór estrela ekipa Choque  ne’e mós nafatin enkoraja nia maluk Jogadór sira atu kontinua treinu no labele lakon esperansa ho rezultadu ne’ebé iha maibé kontinua esforsu ba oin.

Jornalista: Vito Salvadór