Hatutan.com, (04 Dezembru 2023), Díli- Sekretáriu Jerál Federasaun Futebol Timor-Leste (FFTL), Gregório Correia, konfirma katak posibilidade boot antigu Prezidente FFTL, Francisco Kalbuadi Lay sei kompete ho nia kompañeiru Nilton Gusmão iha kongresu estraordináriu ne’ebé sei realiza iha fulan-Janeiru 2024.

Lee Mós: Francisco Jerónimo Ofisiálmente Rezigna hosi Prezidente FFTL

Francisco Kalbuadi Lay ho Nilton Gusmão. Foto/repro

Sekretáriu Jerál FFTL, Gregório Correia hateten, lolos ne’e kompeténsia komisaun eleitorál FFTL nian mak atu fó sai bá públiku kona-bá kandidatu se mak  kompete iha kongresu estraordináriu FFTL nian.

Nia afirma kona-bá kandidatu sira ne’e jornalista no públiku hadomi futeból sira hateten ona, no sira rejista tijh ona iha komisaun eleitorál FFTL nian.

“Há’u hanoin imi rona no hatene barak ona kona-bá sesé mak sei kompete iha kongresu estraordináriu FFTL nian no oras ne’e iha kandidatu na’in-rua mak rejistu, ida mak atuál Vise Primeiru-Ministru koordenadór asuntu ekonomia no ministru turizmu, Francisco Kalbuadi Lay no ida seluk mak Nilton Gusmão,” Gregório Correia bá jornalista sira iha  FFTL, Segunda (04/12/2023).

Sekretáriu Jerál FFTL ne’e hatutan provisoriamente iha kandidatu rua mak rejista, maibé lataka dalan mós bá kandidatu seluk tamba rejistrasaun sei loke too loron 10 fulan-Dezembru.

Nia hateten kandidatu bá prezidente ezekutivu FFTL na’in-rua ne’ebé rejista ne’e prienxe ona rekizitu sira FFTL nian ne’ebé bazeia ba AFC no FIFA sira nia regulamentu.

Asosiasaun sira ne’ebé iha direitu votu ba kongresu Estraordináriu FFTL mak hanesan Asosiasaun Futeból Dili Leste, Asosiasaun Futeból Díli Oeste, Asosiasaun Futeból Covalima, Asosiasaun Futeból Ermera,  Asosiasaun Futeból Bobonaro, Asosiasaun Futeból Manufahi, Asosiasaun Futeból Lautém, Asosiasaun Futeból Baucau, Asosiasaun Futeból Viqueque, Asosiasaun Futeból Manatuto, Asosiasaun Futeból Aileu, Asosiasaun Futeból Manufahi, Asosiasaun Futeból Likisa, Asosiasaun Futeból Oe-Cusse, Asosiasaun Futeból Feto, Asosiasaun Futsal Timor-Leste, Asosiasaun Arbitrajem Timor-Leste, Asosiasaun Treinadór, Kampiaun LFTL primeira divizaun Karketu Díli FC kampiaun segunda divizaun DIT FC.

Jornalista : Vito Salvadór