Hatutan.com, (08 Dezembru 2023), Díli— Timoroan ida ho naran Carlota Maria da Costa monu no husik-iis (mate) iha área Silawan, Atambua, Nusa Tenggara Timur (NTT), Indonézia.
![](https://www.hatutan.com/wp-content/uploads/2023/12/Matebian-Carlota-iha-Silawan-Atambua-300x225.jpeg)
Timoroan ida ho naran Carlota Maria da Costa monu no husik-iis (mate) iha área Silawan, Atambua, Nusa Tenggara Timur (NTT), Indonézia. Matebian hatoba hela iha Postu Saúde Silawan. Foto: Konsuladu Timor-Leste bá Atambua.
Tuir informasaun ne’ebé Hatutan.com asesu, sidadaun ne’e mate iha ohin Sesta 08 Dezembru, 2023 iha área fonteira Indonézia nian.
Lee Mós: UPF Detein Timor-oan Na’in-Haat Hatama Gazolina Ilegál
Sidadaun ne’e foin mak hakat liu fronteira uza pasaporte Timor Leste nian no atu halo vizita ruma bá Atambua Indonézia.
Tuir dokumentu hanesan Pasaporte ho númeru 0067895C ne’ebé iha katak, sidadaun ne’e moris iha Nancuro iha loron 05 fulan Maiu tinan 1965 ho idade 68 no hela fatin atuál iha Surik-mas, Díli, Timor-Leste.
Kronolijia akontesimentu ne’ebé konta hosi bei-oan rasik, katak, timoroan ne’ebé uza Pasaporte Timor Leste, hafoin tau tiha karimbu bá pasaporte, hakat liu fronteira no la’o tama bá área Indonézia nian iha fronteira Mota-ain kuaze metru 500 no to’o iha merkadu PLBN, kuaze iha tuku 11:30, derrepente oin halai to’o nanal naklosu sai hosi ibun laran.
Nune’e mós Kapos PAM Mota-ain, IPDA Fernando Tilman, hato’o katak, matebian monu tanba deskonfia kolen tanba la’o lubuk ida ho idade avansada no sidadaun sira ne’ebé hela iha área ne’e konsege ajuda hodi transporta bá Postu Saúde Silawan maibé la konsege salva.
Iha mós informasaun hosi parte postu saúde ne’e katak, depois ne’e halo diagnosa iha indikasaun katak, matebian sofre hela tensaun no mós sasin hosi ninia bein oan rasik mós hateten katak, matebian iha istória sofre tensaun.
Hatutan.com rekolla mós informasaun hosi pessoál Servisu Imigrasaun nian iha Fronteira Batugade Timor-Leste nian rekoñese katak, loos duni ohin dader iha sidadaun ida ho naran Carlota Maria da Costa uza duni pasaporte Timor Leste sai bá Atambua Indonézia, maibé iha tuku 11:00 sira mós simu informasaun hosi parte Indonézia nian katak, sidadaun ne’e mate.
“Loos duni, ohin ita nian inan feton ida ho idade avansada ona, liu duni bá sorin maibé ami foin simu informasaun katak, ita nia inan feton ne’e mate tanba monu iha Silawan,” pessoál Servisu Imigrasaun ne’ebé lakohi publika nia naran hateten bá Hatutan.com.
Hatutan.com mós konfirma kedan ho Asistente Adida Imigrasaun Timor-Leste bá Atambua, Neldia de Jesus Santos mós rekoñese katak, agora daudaun nia ho ekipa iha hela Postu Saúde Silawan nian no parte Konsuladu koordena hela ho família atu lori mate-isin mai Timor-Leste.
“Daudaun ami iha hela Rumah Sakit Silawan. Hosi Konsuladu sei koordena ho familia para lori mate-isin ba Timor,” Neldia de Jesus Santos ba Hatutan.com via telefónika.
Tuir planu, parte konsuladu sei transporta kedan mate-isin ohin ba Dili, Timor-Leste. (*)