Hatutan.com, (12 Dezembru 2023), Díli—Prezidente Repúblika (PR), José Ramos-Horta konsidera prezépiu Natál ne’ebé halo iha aldeia no vila sira sai hanesan atrasaun turizmu relijiozu ne’ebé úniku no atrativu iha Timor-Leste (TL).
![](https://www.hatutan.com/wp-content/uploads/2023/12/Prezepiu-Natal-300x156.png)
Prezépiu Natál ne’ebé halo iha Palásiu Prezidensiál Nicolau Lobato Bairru-Pité, Tersa (12/12/2023). Foto: Elio dos Santos da Costa.
Prezidente Repúblika hato’o ida-ne’e bainhira halo abertura bá kompetisaun Prezépiu Natál iha Palásiu Prezidensiál Nicolau Lobato Bairru-Pité, Tersa (12/12/2023).
Lee Mós: Prezidénsia Repúblika Sei Organiza Kompetisaun Prezépiu Iha Díli
Iha diskursu, Ramos-Horta hateten, dala ruma rona bei-beik ko’alia kona-bá turizmu relijiozu, iha rai balun turizmu relijiozu fásil tanba milagre Fátima entaun hotu-hotu hakarak haree bá fatin ne’ebé uluk 1917 milagre ida ne’e akontese bá.
Iha rai Franca, milagre bo’ot entaun turista sira bá, Filipina tinan-tinan iha Páskua 1 millaun turista. Tanba buat ida prosisaun ne’e sira kastigu-an ho korrenti baku no halo via sacra ida atrativu loos.
Iha Timor-Leste hanoin atu halo duni hanesan Filipina, maibé hanoin katak Timoroan sira lalika atu baku ida seluk fali halo ran, entaun Timor pasífiku liu.
“Buat ne’ebé Timor-Leste nian iha no ekivalente ho Filipina nian maka prezépiu Natál. Selebrasaun Natál iha Timor-Leste úniku no atrativu loos tanba iha sidade hotu iha mundu ne’ebé Natál prezépiu halo iha fatin hotu-hotu, iha estrada ninin to’o foho ne’ebá só iha Timor deit. Prezépiu ne’e mak atraksi atrativu Timor nian, Katóliku no kristaun sira iha Indonézia, Malázia, Singapura, Korea Súl, Austrália, Japaun sira hakarak mai tanba ida-ne’e,” Ramos-Horta hateten.
Xefe Estadu hatutan, Tinan ruma liu bá la hatene matenek se mak bandu fali prezépiu ne’e, entaun hakfodak mas afinál Amu Bispu sira la hatene buat ida kona-bá se mak bandu fali, rona polísia mak bandu, depois komesa dun-malu to’o Igreja nunka hateten ida-ne’e, Igreja rekomenda de’it favór se halo prezépiu Natál hotu-hotu respeita.
Dala ruma joven balun tau múzika dansa, se dansa ne’e la’ós problema tanba ne’e ita selebra Nai Jessus Kristu nia tinan, agora hemu tua lanu depois lori tama fali tua iha prezépiu laran ne’e mak labele.
Timor úniku ne’e maka karaterístiku bo’ot ida prezépiu Natál ne’e, foin daudaun iha internet populasaun Katólika Timor nian 99.6% ne’e dadus estatístiku primeiru iha mundu segundu Filipina.
“Ha’u ko’alia ho Amu Kardiál, entaun hahú fila-fali, maun bo’ot Xanana entuziamu mós haruka suku hotu-hotu tinan ida ne’e atu halo prezépiu. Ne’e mak sai atraksi turistiku no maneira ema Timoroan selebra Natál,” Ramos-Horta subliña.
Tuir Ramos-Horta, sei iha prémiu di’ak bá sira-ne’ebé ho inisiativa halo prezépiu Natál, tanba sira halo buat hotu-hotu ho sira nia servisu laiha subsídiu ba sira.
Jornalista: Vito Salvadór