Hatutan.com, (12 Dezembru 2023), Díli—Prezidente Repúblika (PR), José Ramos-Horta fó posse bá embaixadór na’in-neen no husu atu servisu ho kompeténsia, seriedade no dedikasaun hodi lori duni imajen Timor Leste nian iha mundu, buka atu kontribui bá nesesidade sira nasaun ne’e nian.

Prezidente Repúblika (PR), José Ramos-Horta fó posse bá embaixadór na’in-neen iha Palásiu Prezidensiál Nicolau Lobato Bairru- Pité, Tersa (12/12/2023). Foto: Elio dos Santos da Costa.

Embaixadór Timor-Leste na’in-neen ne’ebé simu posse hodi hala’o misaun diplomátika mak hanesan Dionísio da Costa Babo Soares hanesan Embaixadór Timor-Leste ba misaun permanente iha Nasoens Unidas, António da Conceição Embaixadór Timor-Leste bá Repúblika Indonézia, Maria Angela Guterres Viegas Carascalão Embaixadóra Timor-Leste bá Repúblika Federativa Brazil, Filomeno Aleixo da Cruz Embaixadór Timor-Leste bá Repúblika Populár Laos, Chole Dindo Embaixadora Timor-Leste bá Estadu Sidade Vaticano no Alexandre Vital da Cruz Araújo Embaixadór Timor-Leste bá Repúblika Singapura.

Lee Mós: Ramos-Horta Fó Pose bá Loro-Horta ho Marciano da Silva Nu’udár Embaixadór bá Repúblika Populár Xina no Filipina

Prezidente Repúblika (PR), José Ramos-Horta fó posse bá embaixadór na’in-neen iha Palásiu Prezidensiál Nicolau Lobato Bairru- Pité, Tersa (12/12/2023). Foto: Elio dos Santos da Costa.

José Ramos-Horta hodi Estadu no rai ne’e nia naran agradese ba disponibilidade atu servi rai ne’e iha país sira ne’ebé sei bá hala’o misaun diplomátika hodi reprezenta Estadu Timor-Leste,  tanba nasaun hotu-hotu iha mundu importante mós bá TL.

Embaixada reprezenta Xefe Estadu, Estadu reprezenta mós Governu no nasaun ida-ne’e, tanba ne’e aspetu hotu ne’ebé sai hanesan imajem Timor-Leste nian iha país sira ne’ebé Embaixadór sira sei reprezenta bá importante atu promove hodi kontribui ba nasaun ne’e nia dezenvolvimentu.

Nasaun hotu-hotu importante bá Timor-Leste, balun ne’ebé Timor-Leste estabelese ona embaixada no balun seidauk maibé hotu-hotu importante no nasaun balun sei hein sira nia akreditasaun konstituitivamente molok TL estabelese Embaixada iha ne’ebá.

António da Conceição, Embaixadór Timor-Leste bá Repúblika Indonézia, simu pose iha Palásiu Prezidensiál Nicolau Lobato Bairru- Pité, Tersa (12/12/2023). Foto: Elio dos Santos da Costa.

“Embaixadór sira tenke servisu ho kompeténsia, dedikasaun no seriedade, ba Embaixadór no Embaixadóra sira hamutuk ho funsionáriu sira embaixada nian tenke iha responsabilidade no iha relasaun servisu hosi loron ba loron atu bele hatan ba nesesidade sira iha país ne’e nian no halo bu’at ne’ebé di’ak bá povu Timor-Leste,” Ramos-Horta hateten bá Embaixadór foun sira iha Palásiu Prezidensiál Nicolau Lobato Bairru- Pité, Tersa (12/12/2023).

Xefe Estadu mós subliña atu Embaixadór no Embaixadóra sira bele ko’alia konkretamente kona-bá prióridade sira Timor-Leste nian iha kada país ne’ebé Timor-Leste estabelese Embaixada, hodi define relasaun multilaterais no bilaterais entre Timor-Lesteno pais sira seluk.

Chole Dindo, Embaixadora Timor-Leste bá Estadu Vaticano simu pose iha Palásiu Prezidensiál Nicolau Lobato Bairru- Pité, Tersa (12/12/2023). Foto: Elio dos Santos da Costa.

“Nune’e felisita ita bo’ot sira, dezeju susesu ba imi hotu, ita bo’ot sira nia susesu hanesan país ne’e nia susesu,” Ramos-Horta dezeja.

Vise-Ministra assuntu ASEAN, Milena Rangel hateten Ohin Timor-Leste liu hosi Prezidente Republika José Ramos-Horta fó pose bá embaixadór TL nian na’in-neen ba missaun permanente missaun Nasoens Undas, Republik Indonesia, Brazil, Santa Se, Republika Sigapura, no Laos.

Prezidente Repúblika fó pose bá embaxadór na’in ne’e, tanba embaxadór sira ne’ebé halo hela missaun iha nasaun sira ne’ebé iha sira nia misaun remata ona no besik atu fila-fali mai Timor-Leste.

“Embaixadór sira ne’ebé hala’o misaun diplomátika iha liur atu fila ona. Tanba ne’e nomeia fali embaixadór foun sira ne’e atu ba prienxe fali vaga Xefe misaun embaixadór sira nian iha nasaun sira ne’ebé dezigna ba,” Milena Rangel hateten.

Mandatu bá Embaixadór no Embaixadóra sira ne’ebé ohin simu posse ho durasaun tinan tolu,  maibé depende nesesidade bele halo extensaun.

Jornalista: Vito Salvadór