Hatutan.com (13 Novembru 2023), Díli—Ministériu Públiku (MP) liu hosi Prokuradór Jerál Repúblika (PJR), Alfonso Lopez seidauk bele fó komentáriu kona-bá prosesu kazu Ró Haksolok tanba konsidera segredu justisa.

Prokuradór Jerál Repúblika (PJR), Alfonso Lopez. Foto: Elio dos Santos da Costa.

Alfonso Lopez ko’alia ida-ne’e hodi hatán bá Jornalista Hatutan.com ne’ebé husu kona-bá antes ne’e Koordenadora Ekipa Traballu Reforma Justisa, Lúcia Lobato deskonfia katak, MP mak budu kazu Ró Haksolok no lakohi aselera ka prosessa ba Tribunál.

Lee Mós: Ministériu Públiku Mak “Budu” Kazu Ró Haksolok

“Ministériu Públiku labele ko’alia sai  no tenke kuidadu. Ne’e signifika, tenke ko’alia oitoan liu-liu bá Jornalista sira, respeita ita boot sira maibé tenke hatene segredu Justisa. Ne’e segredu justisa. Kuandu tama ona bá akuzasaun ka arkiva ne’e públiku bele hatene.  Maibé kuandu faze investigasaun ida-ne’e la’o tuir etapa,” Alfonso Lopez hateten hafoin akompaña Prezidente Repúblika, José Ramos-Horta vizita bá Armazen CLN, Kuarta (13/12/2023).

PJR Alofonso Lopez mós haruka fila fali Jornalista atu ba husu iha Komisaun Anti Korupsaun (KAK) kona-bá prossesu investigasaun bá kazu Ró Haksolok ne’e rasik.

Tuir PJR katak, labele purminorizada no tenke identifika ida-idak tanba dadaun ne’e iha kazu hamutuk 13.000-resin mak prossesu la’o hela, besik 4.000 maka prosesa ona.

“Kuandu faze investigasaun, Prokuradór kumpri ida-ne’e. Kumpri nia papél tuir Lei kuadru normativu haruka,” nia esklarese.

Nia mós afirma katak, kualkér sidadaun ne’ebé mak iha koñesimentu kona-bá kazu Ró Haksolok, odamatan boot Ministériu Públiku nakloke tanba iha turnu Sábadu ho Domigu, loron boot Natál, Páskua no sira seluk mós Prokuradór sira sempre iha turnu.

Kona-bá deklarasaun Koorndenadora Grupu Traballu Reforma Justisa, Lúcia Lobato nian katak, PJR maka budu kazu Ró haksolok, nia dehan husu de’it ba iha Lúcia Lobato.

“Ha’u la hatene ida-ne’e. Ami sira ne’e kuandu ko’alia konkretamente, labele ko’alia arbiru iha-ne’e,” nia tenik.

Iha fatin hanesan, Diretór Jerál Investigasaun KAK, José de Araújo Verdiál hateten, normalmente relatóriu Kámara Kontas ne’e haruka diretamente bá Ministériu Públiku.

“Ha’u la lembra, maibé se la sala relatóriu Tribunál de Kontas ne’e haruka ona bá MP iha tinan tolu liu bá. Bazeia bá relatóriu sira ne’e maka MP delega bá KAK hodi halo investigasaun. Ha’u labele hateten bá públiku saída de’it mak mosu iha relatóriu laran tanba iha hela faze investigasaun. Se ami halo ona investigasaun, signifika iha indísiu krime korrupsaun,” nia afirma.

Jornalista: Gloria Maia