Hatutan.com, (16 Dezembru 2023), Díli—Kompañia Jigante INPEX Corporation Japaun, iha interese boot hakarak atu hametin ninia kooperasaun hodi investe iha seitór minarai no gás iha Timor-Leste (TL).
Primeiru-Ministru, Kay Rala Xanana Gusmão akompaña hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Vise no Ministra bá Asuntus ASEAN, Milena Maria da Costa Rangel hamutuk ho Embaixadór Japaun bá Timor-Leste, Ilídio da Costa Ximenes hala’o enkontru ho Prezidente no Diretór Ezekutivu Kompañia INPEX Corporation, Takayuki Ueda iha otél The Okura Tokyo, Japaun, Sesta (15/12/2023). Foto: GPM.
Prezidente no Diretór Ezekutivu Kompañia INPEX Corporation, Takayuki Ueda informa assuntu ne’e, durante hala’o enkontru ho Primeiru-Ministru, Kay Rala Xanana Gusmão akompaña hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Vise no Ministra bá Asuntus ASEAN, Milena Maria da Costa Rangel hamutuk ho Embaixadór Japaun bá Timor-Leste, Ilídio da Costa Ximenes iha otél The Okura Tokyo.
Lee Mós: Empreza Internasionál hosi Japaun Hakarak Harii Estaleiru Naval Timor-Leste
INPEX Corporation nu’udár kompañia jigante ida iha Japaun ne’ebé iha ona esperiénsia tinan barak hala’o servisu iha dezenvolvimentu indústria mina no gás iha Japaun no daudaun ne’e hala’o investimentu indústria enerjia iha nasaun avansadu.
Prezidente Kompañia INPEX Corporation, Takayuki Ueda agradese tebes no sente previleziadu hasoru-malu ho Xefe Governu Xanana Gusmão ho ekipa tanba bele fó oportunidade hodi ko’alia kona-bá futuru dezenvolvimentu iha mina no gás.
“Ekipa hosi INPEX Corporation sente previléziu tebes no biban ne’e agradese ba oportunidade hodi hasoru malu ho ita boot iha momentu ida ne’e. INPEX Corporation hanesan kompañia Japaun nian, hanesan Kompañia boot Japaun nian, ne’ebé durante ne’e halo explorasaun no dezenvolve mina no gás no ida ne’e foin primeira vez ba kompañia Inpex Coorporation hodi hasoru malu ho Primeiru-Ministru Xanana Gusmão,” Hatutan.com deklarasaun sita Takayuki Ueda iha komunikadu, Sábadu (16/12/2023).
Primeiru-Ministru Kay Rala Xanana Gusmão agradese no esplika kle’an hodi konvida direta INPEX Corporation atu hala’o vizita mai Timor-Leste hodi haree direta kondisaun Timor-Leste no ba futuru bele loke investimentu mina no gás iha Timor-Leste.
Estadu Timor-Leste liu hosi Timor GAP, E.P hola parte ona iha konsórsiu Greater Sunrise, ho partisipasaun maioria reprezenta 56,56%, Woodside (operadora) 33,44% no Osaka Gás 10%.
Jornalista: Rogério Pereira Cárceres